Home > Aición sindical > Nin un despidu ente les trabayadores de la Educación Infantil

Nin un despidu ente les trabayadores de la Educación Infantil

SUATEA esixe al Conseyeru d’Educación que nun heba nin un solu despidu ente les trabayadores de la Educación Infantil y qu’atienda toles reivindicaciones del profesoráu asturianu.

La propuesta de cheque escolar ye incompatible col calter públicu d’esta etapa educativa y cola so integración nel sistema públicu asturianu.

Dende SUATEA vemos con preocupación les actuaciones de la Conseyería d’Educación que va suponer decenes de despidos o de reducciones de xornada pa les educadores que trabayen en delles de les escueles de 0-3 años. Ye la propia conseyería la que tien la capacidá de fixar les plantiyes y ye’l conseyeru a quien-y correspuende que’l so mandatu nun entame con un recorte n’atención a los neños y neñes. La pareya educativa a tiempu completu que defendemos dende SUATEA y el restu d’organizaciones comprometíes col calter públicu d’esti tramu educativu ye imprescindible pa garantizar una correcta atención a los neños y neñes qu’acuden a estes Escueles.

La propuesta del Cheque Bebé allóñase de lo que defendemos. Los fondos públicos tienen que destinase a garantizar la gratuidá d’esti tramu educativu y la so integración nel sistema públicu asturianu. Hai que garantizar esti serviciu nunes condiciones dignes, acabando cola desigualdá qu’esiste dependiendo del conceyu onde s’asitie la escuela. Tien que s’acabar cola precariedá tamién nesti sector dotando a cada aula de bebés del personal necesariu y a toles escueles d’una dirección unipersonal. Ye un compromisu del nuevu gobiernu y por ello una obligación pal nuevu Conseyeru.

Sicasí, la conseyería tien otres munches xeres pendientes. Hai que recordar que’l día 21 que vien ta previsto asoleyar les llistes de profesoráu interín que tien que solicitar plaza’l día 25 nos distintos centros educativos y qu’hai un centenar de docentes que nun apaecíen nes llistes provisionales espublizaes a principios d’agosto. Esiximos a la Conseyería la inclusión de toos estos docentes nes llistes pa que puedan solicitar plaza’l día 25. Esti ye l’últimu de los incidentes nun procesu selectivu estráu d’erros y de reclamaciones.

D’otra parte, dende SUATEA queremos puntualizar que n’Asturies más de la cuarta parte del profesoráu del enseñu públicu ye interín; que durante años la tasa de reposición foi inferior al 30% llegando en dellos años hasta un ridículu 10%. Por ello hai especialidaes de profesoráu onde lleven ensin oposiciones más de 15 años, lo que fae qu’heba docentes con esos años d’interinidá nel so llombu. Otres como les de llingua asturiana nunca tuvieron siquiera esa oportunidá. Agora’l gobiernu central, con una anuncia claramente electoralista, fala d’una tasa de reposición del 100%.

Pal cursu que vien la Conseyería tien que reducir drásticamente les medies xornaes, dotar a tolos centros del profesoráu necesariu pa garantizar una correcta atención educativa y establecer canales de diálogu colos llexítimos representantes de los trabayadores pa tratar tolos asuntos pendientes (paralización de la LOMCE, dotación de plantiyes, llibros de testu, “melicamentazu”, ente otros munchos) y colos equipos directivos y acabar coles práctiques negatives que l’anterior Conseyera y el so equipu desenvolvieron.

Secretariáu d’Asturies de SUATEA

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4339

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4339