Home > Comunicaos > Nenguna aula con más de 25 alumnos/es y tratu dignu al personal docente

Nenguna aula con más de 25 alumnos/es y tratu dignu al personal docente

Una esixencia de SUATEA al Conseyeru d’Educación

Nel conceyu que la Xunta de Personal Docente caltuvo col Conseyeru d’Educación na que taben presentes los Directores Xenerales correspondientes, tratáronse una riestra de temes relevantes nesti entamu cursu.

SUATEA plantegó la necesidá d’afitar un calendariu de negociaciones cola Conseyería que ruempa la dinámica del anterior equipu de falta de diálogu y d’imposiciones. Esi non atender pa la representación de los docentes traxo como consecuencia problemes graves col calendariu y col sistema d’axudicación del profesoráu interín y nel desarrollu de les oposiciones.

Darréu, propunximos un cambiu radical de la manera d’entamar les negociaciones na Mesa Sectorial y les rellaciones cola Xunta de Personal Docente, con un calendariu de trabayu qu’ incluya una verdadera negociación de plantiyes que respete los alcuerdos existentes (cosa qu’agora nun se ta faciendo) y qu’afite reuniones periódiques cola Xunta de Personal.

Dende SUATEA tamién pidimos la derogación del “medicamentazu” y de la normativa de préstamu de llibros.

No tocante a la situación de la Llingua asturiana, SUATEA denunció que nun se ta cumpliendo la Llei d’Usu y qu’hai alumnáu al que se-y ta negando la posibilidá de cursar l’asignatura, amás de volver a reivindicar la creación de la Especialidá Correspondiente. El Director Xeneral comprometióse a subsanar tolos errores y a llantar un plan de refuerzu d’esta materia.

No que cinca al anunciu fechu pol Conseyeru sobre la modificación de la rede de centros, SUATEA avisó de la posibilidá de perder ufierta formativa sobre too nes zones rurales y con tendencia a la despoblación y aneció na esixencia d’un ciclu de bachilleratu pa Zarréu.

Y afondando nel asuntu del Decretu de recortes estatal y no referente a les ratios, especialmente en primaria, SUATEA denunció la existencia n’Asturies d’aules de primaria con 28 alumnos, cuando la LOE consolidada establez a les clares 25 alumnos/es por aula como máximu-art. 157- que namás se pueden perpasar nun 10% si l’alumnáu ye d’incorporación tardía o por movilidá forzosa de la familia- art 87-. El Decretu de Midíes de Racionalización del 2012 recueye qu’esti incrementu pase del 10% al 20% sólo si la tasa de reposición d’efectivos prevista nos presupuestos xenerales del Estáu ta per debaxo del 50%. Esti añu foi precisamente del 50%, pero la Conseyería, garrándose a esti puntu, ta dando órdenes a los centros de facer aules d’hasta 28 alumnos/es (por si 27 yeren pocos). Dende SUATEA volvemos dicir que cualquier ratio inicial perriba de 25 alumnos/es ye ILLEGAL y tien que se desdoblar el grupu afectáu.

El nuevu calendariu escolar, propuesta que salió de SUATEA y que fuera aceptada pola mayoría de la comunidá educativa pa ser estudiada, va ser oxetu de negociación esti cursu.

Pola mor de l’aplicación de la LOMCE que yá ta suponiendo perdes de puestos de trabayu, sobrecarga de llabores y segregación pal alumnáu, SUATEA demandó a la Conseyería apoyu al trabayu del profesoráu qu’agora, ente los retayos y la nueva llei nun ye quien p’atender de manera curiosa a tolo que se requier. El verdaderu perxudicáu ye l’ alumnáu, sobre manera’l más desfavorecíu. Por ello SUATEA esixó que n’Asturies nun se faiga la reválida de 6º de primaria polo que supón de segregador pa los alumnos/es.

La Conseyería comprometióse a incluyir nes negociaciones la regulación sobre’l calendariu d’axudicaciones y desenvolvimientu del procesu selectivu (tema únicu per especialidá, publicación de criterios de calificación, inclusión de places pal profesoráu con discapacidá,). SUATEA volvió dicir que munchos de los errores d’esti añu taríen solucionaos si tuvieren fecho casu de les nuestres propuestes. Nun se fixo y el desastre foi total nesti principiu de cursu.

Delantre del anunciu de la Conseyería de presentar un borrador col máximu númberu de places susceptibles de convocase a oposición en Secundaria, FP y otres enseñances de réxime especial, SUATEA plantegó la necesidá de qu’esa convocatoria tuviera acompañada de la negociación d’un alcuerdu d’interinos nuevu que mire pola situación d’esti colectivu y garantice la so estabilidá énte un sistema d’acceso a la función pública inxustu.

La Conseyería tuvo pol llabor de negociar la reducción horaria pal profesoráu mayor de 55 años, a lo que SUATEA recordó qu’en cualquier casu habría d’aplicase ensin mengua retributiva.

A la petición sindical de volver a les 18 hores en secundaria y a los apoyos en Primaria ya Infantil y la recuperación de les condiciones llaborales del profesoráu, la Conseyería atéchase nel calter estatal de los recortes. Plantegámos-yos qu’hai midíes de posible aplicación como la conversión de les guardies non llectives en llectives.

P’acabar, el Director Xeneral de la Función Pública informó sobre la devolución de la paga estra de 2012, adelantando que ye probable qu’esti añu se pague alredor del 26% d’ella, como dixo la Conseyera na Xunta General.
Uviéu, 24 de setiembre del 2015
Secretariáu d’Asturies de SUATEA

Esta entrada tamién se puede consultar en: Castellanu