Home > Comunicaos > Nengún alcuerdu na propuesta d’ufierta d’empléu públicu pal cuerpu de maestros

Nengún alcuerdu na propuesta d’ufierta d’empléu públicu pal cuerpu de maestros

Na última mesa sectorial de negociación celebrada güei 13 de febreru l’alministración asturiana presenta la ufierta d’empléu públicu definitiva pal cuerpu de maestros:

ESPECIALIDÁ TOTAL PLACES RESERVA DE DISCAPACIDÁ RESERVA DE DISCAPACIDÁ INTELECTUAL
PRIM Primaria 38 4 1
AL Audición y Llinguax 21 1 1
PT Pedagoxía Terapéutica 28 1 1
EI Educación Infantil 68 1
FI Idioma estranxeru: Inglés 33 2 1
TOTAL RESERVA DE DISCAPACIDÁ 9 4
TOTAL 188

En SUATEA consideramos a tolos efectos esta ufierta insuficiente, en cuantes que nun respuende a les necesidaes reales teniendo en cuenta que se superen les 300 xubilaciones a lo llargo del 2014. Aumentáronse 30 places con respecto de la propuesta inicial pero esto nun igua’l problema real de les plantiyes. Con esta ufierta sigue afondándose na precariedá de la plantiya asturiana de docentes, una y bones la tasa d’interinidá global va siguir aumentando.
Dende SUATEA esiximos que se cubran el 100% de les places y demandemos nuevamente facer una xunta onde tratar toes aquelles cuestiones rellacionaes col desenvolvimientu de les oposiciones qu’esmolecen al colectivu interín.
L’alministración va imponer finalmente’l so criteriu cola oposición de toles organizaciones sindicales. Ye esta una forma d’actuar que se ta convirtiendo en vezu y que nun creemos que favoreza’l clima de necesariu consensu pa caltener con dignidá la calidá del sistema educativu asturianu nun contestu de crisis.
Queremos añedir, en defensa de colectivu de profesoráu interín, qu’en SUATEA esmolécennos amás les consecuencies que va tener l’aplicación del nuevu alcuerdu d’interinos, col que nun va ser posible aportar a llistes de nueves especialidaes o onde nun se tomen midíes de protección que sí se dan n’otres Comunidaes Autónomes. Vamos siguir esixendo la eliminación d’esos requisitos que los ponen en posición de desventaxa y desigualdá frente al restu.
Uviéu, 13 de febreru del 2015

Esta entrada tamién se puede consultar en: Castellanu