Negociar, verbu inesistente pa la Conseyería d’Educación

Na mañana de güei, 18 de mayu, tuvo llugar la primer xunta de Mesa Sectorial de negociación del sector d’Enseñanza pública desque’l nuevu equipu e  fizoe cargu de la Conseyería fai cerca un añu.

En tou esti tiempu, la Conseyería prescindió absolutamente del marcu llegal reconocíu para tratar les cuestiones rellacionaes coles condiciones llaborales del personal docente.   Siendo esti fechu grave en sí mesmu, ye tovía más si  se tienen en cuenta les circunstancies estraordinaries nes que se ta desenvolviendo esti cursu dende’l pasáu mes de marzu por cuenta la pandemia del COVID 19, pos, al exercer la docencia a distancia, desreguláronse les sos condiciones de trabayu de forma radical.

Hai que recordar que, pa llegar a esta convocatoria, énte la inesistente voluntá per parte de l’Alministración de convocar la Mesa Sectorial d’Educación, toles organizaciones sindicales presentes en dicha Mesa solicitémoslo per Rexistru’l pasáu 26 d’abril. Trescurríu casi un mes, convócasenos ensin tener en considerancia nengunu de los puntos a encetar que presentáramos dende la parte social/ sindical. Al contrario, presentósenos dende la Conseyería un documentu centráu nos pasos a dar nel procesu de desescalada  pa la fase 2  a partir del día 25 de mayu que, amás de les faltes ya incongruencies denunciaes por SUATEA, yá fuera presentáu con anterioridá n’otros ámbitos.

Paeznos esmolecedor, y asina lo denunció SUATEA na so intervención, que la Conseyería desconoza l’espaciu correspondiente a la Mesa Sectorial. Albidramos qu’esta Alministración intenta xugar al despiste pa evitar una verdadera negociación. Aconceyó cola patronal de la escuela concertada, informa al traviés de la prensa, toma como interlocutores a unos comités de dirección de los centros educativos, que ye un organismu inesistente en términos llegales, too menos convocar la Mesa Sectorial y axustar colos sindicatos les nueves condiciones llaborales del profesoráu. El so xuegu ye facer usurpación de funciones a la Mesa Sectorial porque d’esa manera evita falar de lo fundamental, la preparación de les condiciones pal entamu del cursu 2020-21 en términos de midíes de seguridá, distanciamientu social, ratios nes aules, refuerzu de plantiyes, refuerzu de financiamientu necesariu, etc. 

Al contrario, güei vimos cómo se presenten a una xunta de MS con un documentu zarráu que poco tien de negociación. Nel documentu, que refuguemos por unanimidá toles fuerces sindicales, impónense midíes que dende SUATEA consideramos que son, a lo menos arriesgaes.  La Conseyería vien descargando el tomar de delles decisiones, y polo tanto l’asunción de responsabilidaes nos equipos directivos. Acoyéndose a l’autonomía de los centros, tresvasar a quien exercen les Tutoríes la responsabilidá d’entamar y coordinar l’adaptación de programación pa esti atípicu final de cursu. Agora preténdese que sían los equipos directivos los encargaos d’entamar una desescalada arriesgada regulando la torna a los centros, la compra de material de protección al cargu de los  presupuestos yá mermaos de los centros, la reincorporación del profesoráu y el so horariu d’atención al alumnáu, la organización de los espacios, etc.

Dende SUATEA aportunemos na nuesa oposición a la reapertura de los centros y la vuelta a la enseñanza presencial porque nun se dan les condiciones sanitaries y porque la vuelta a l’actividá lectiva trai más riesgos que beneficios; ye una midida imprudente, ya inclusive temeraria, porque nun va poder garantizar la salú de la comunidá educativa, y por estensión, de tola ciudadanía. L’apertura de les aules pa trés o cuatro selmanes nun aporta nada porque’l profesoráu yá ta organizáo exerciendo docencia a distancia, yá ta reafayao, yá modificó les sos programaciones y la so forma de trabayu.  Esmoleznos qu’esta decisión, que consideramos errónea, puea llevar a posibles contaxos igual que vemos con disgustu que la torna del alumnáu, inclusive’l de menores d’edá, se plantegue de forma voluntaria, ensin nin siquier pidir cita previa, consolidando una doble xornada presencial y telemática pal profesoráu.

La Conseyería demostró, nesta MS, l’escasu, por non dicir nulu, respetu que tien a los representantes llegales del profesoráu de la escuela pública al nun abrir una negociación real y convertir esa xunta n’otra puramente informativa d’un documentu que yá ta en poder de los centros educativos, de la escuela concertada y de la prensa.

Uviéu 18 de mayu de 2020