Home > Comunicaos > Negociación polémica del calendariu escolar.

Negociación polémica del calendariu escolar.

Énte’l discutiniu creáu pola negociación del calendariu escolar pal cursu 2019/20, SUATEA fai les siguientes valoraciones:

En dicha negociación participen cada añu los distintos sectores de la comunidá educativa y l’Alministración. Nesta ocasión, la Xunta de Personal Docente llevó la propuesta consensuada d’un calendariu que coincidía básicamente col presentáu polos directores de los centros de Primaria, qu’incluyía un periodu de descansu de cinco díes n’Antroxu. Delles asociaciones de padres manifestáronse dende’l primer momentu en contra d’acumular díes de descansu. L’Alministración, a pesar de reconocer n’otros momentos que xuntar dellos díes de descansu ameyora’l rendimientu escolar, nesta ocasión optó por sofitar a una parte de los representantes de les families y fixo oyíos sordos al restu de propuestes. De poco sirvieron les que partieron de la Xunta de Personal Docente (formada poles seis Organizaciones sindicales que representen al profesoráu), y de los Comités de directores de centros públicos de Primaria y Secundaria, que sofitaben tamién FAPAs Xixón y OTECAS.

Llama l’atención l’actitú irresponsable d’esta Conseyería que non solo nun fixo nada por favorecer el consensu y plegóse namás a los intereses d’una de les partes, sinón que fai declaraciones xustificando la so postura con medies verdaes y acusando a los representantes del profesoráu d’irresponsables por proponer 9 díes de descansu na selmana d’Antroxu (en realidá, proponíense 5 díes), declaraciones que ponen en cuestión la profesionalidá del profesoráu.

La Conseyería nun esplica que los sindicatos llevamos munchos años reclamando que los díes d’esames estraordinarios y evaluaciones de setiembre nos Cuerpos de Secundaria cuenten como llectivos, como asocede na mayoría de les CCAA, pos son díes nos que los docentes realicen xeres d’atención directa al alumnáu y trabayen a plenu rendimientu, pero la Conseyería tamién nesta cuestión namás niega  la mayor.

Por supuestu que les families se merecen tol respetu, pero tamién esiximos respetu pal profesoráu y, cómo non, pa tolos alumnos y alumnes, que se merecen un calendariu ellaboráu con un perfil pedagóxicu que facilite y favoreza el so rendimientu a lo llargo del cursu escolar.

Uviéu a 3 d’abril de 2019.

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344