Negociación sobro’l procesu d’estabilización d’empléu:

Esta entrada está disponible en: Castellano (Castellanu)

STEs-i DENUNCIA QUE’L MECD PRETENDE ZARRAR LA NEGOCIACIÓN CON CAMBEOS INSATISFACTORIOS NEL BORRADOR DE R.D. TRANSITORIU D’ACCESU, LO QUE PUEDE SUPONER UN ERE MASIVU PAL PROFESORÁU INTERINO

Na mañana de güei, 23 de payares de 2017, celebróse la cuarta Mesa sectorial convocada pol Ministeriu d’Educación pa siguir la negociación del procesu d’estabilización pola aplicación del Alcuerdu pa la Meyora del Empléu Públicu de 29 de marzu y los Presupuestos Xenerales del Estáu de 2017. Amás, el Ministeriu apurrió a les OOSS el borrador de nuevos temarios d’oposiciones.

El Ministeriu insiste en que l’Alcuerdu pa la Meyora del Empléu Públicu de 29 de marzu, robláu por UXT, CCOO, CSI-F y el Ministeriu de Facienda coles mires d’amenorgar la tasa d’interinidá al 8% nes Alministraciones Públiques (tasa que n’educación pública supera’l 25 %) tien por oxetivu algamar la estabilización de los puestos de trabayu, pero non l’afitamientu nel empléu de les persones que los ocupen.

La mayoría de los sindicatos de la Mesa Sectorial sostienen que tamos énte una situación escepcional, pol altu porcentaxe d’interinidá y l’intención d’amenorgalo al 8%, lo que rique de midíes en consecuencia escepcionales que dexen l’afitamientu del emplegu del profesoráu interino y eviten el grave riesgu de despidu de persones que, en munchos casos, lleven décades trabayando como docentes.

Nes negociaciones previes a la de güei, el Ministeriu almitió delles propuestes (medría del númberu de temes a escoyer nes pruebes escrites y la medría del pesu de l’antigüedá hasta 10 años a razón de 0,7 puntos per añu), pero paeciéronnos absolutamente insuficientes y engañoses. Ello ye que col nuevu cómputu propuestu, el pesu de la esperiencia queda nun 12,5% del total (inferior al 13,56% del sistema vixente), bien lloñe del 45% que ye posible según sentencies emitíes pol T.C. Pero lo más relevante ye qu’el MECD nun aceuta la propuesta de la mayoría sindical de que les pruebes nun seyan eliminatories, un elementu que consideramos que ye esencial nel contestu nel que se van a desenvolver estos procesos selectivos. Que les pruebes nun seyan eliminatories ye absolutamente determinante pa que les persones qu’opositen, compensando les notes llograes nes distintes pruebes, puedan llegar a la fin de la fase d’oposición y sumar la fase de concursu.

Los STEs-i refugamos nel so momentu l’Alcuerdu de 29 de marzu, fundamentalmente porque nun garantiza l’afitamientu como funcionaries y funcionarios del personal interino. Esiximos tamién l’establecimientu de criterios homoxéneos en toes les CCAA pal cómputu de places a convocar, pero nestos momentos tovía nun hubo alcuerdu ente les alministraciones territoriales y la central, información que per otra parte non se nos dio en mano na mesa sectorial.

Otramiente, STEs-i entiende que l’amenorgamientu drásticu de la tasa d’interinidá per debaxo del 8% supón una amenaza pa la so continuidá nel trabayu si nun s’axusten midíes d’estabilidá que protexan l’emplegu del personal interino.

Por responsabilidá énte la incertidume ya inseguridá de miles de profesores interinos ya interines que se xueguen el so futuru como docentes nestos procesos de estabilización, STEs-i, ensin arrenunciar al nuesu modelu d’accesu estremáu o a la posibilidá de desenvolver l’artículu 61.6 del EBEP, sumóse a la mayoría de OOSS na defensa d’un accesu transitoriu que puea ameyorar sustancialmente el RD 276/2007 anguaño vixente. La presión sindical y la PNL apocayá aprobada na Comisión d’Educación del Congresu de los Diputaos llevaron al Ministeriu a repensar que les pruebes de la fase d’oposición sigan siendo eliminatories, lo que va consultar a l’Abogacía del Estáu, de manera que la so decisión al respeutu sigue en suspenso.

Per otra parte, el MECD presentó un borrador de nuevos temarios pa tolos cuerpos y especialidaes docentes, actualizaos y adaptaos a la LOMCE, una llei refugada pola comunidá educativa y agora n’espera de la so derogación. Anque munchos temarios tán obsoletos y precisen actualizaciones, nesti momentu un cambéu de temarios tan radical va añadir más esmolición y dificultaes a les persones aspirantes. Por ello, defendimos que s’executen tolos procesos selectivos hasta 2022 ensin cambéu de temarios. El cambéu de temarios, n’una coxuntura como ésta, nun fai más qu’añadir inseguridá, incertidume y dificultaes.

Repitimonos na nuesa denuncia de que, de nun ser teníes en cuenta les nueses propuestes, el nuevu sistema va significar un auténticu ERE que podría suponer el despidu de miles de docentes nel estáu español. STEs-i entiende qu’el MECD ta cerrando esta negociación ensin tener en considerancia nin siquier los mínimos requisitos esixíos poles organizaciones sindicales, polo que de confirmase definitivamente esto, el sindicatu va proponer movilizaciones a los colectivos afectaos.

Secretariáu de STEs-i

23 de payares de 2017

NOTA:
– EL MECD diónos  UNOS BORRADORES DE TEMARIOS QUE PODEIS DESCARGAR DENDE  EQUí O PIDÍNOSLOS PEL CORRÉU ELECTRÓNICU A SUATEA@SUATEA.ORG
– TAMIÉN MOS DIERON  UN BORRADOR COLA MODIFICACIÓN DEL DECRETU D’ACCESU QUE PUEDE VESE EQUí

Print Friendly, PDF & Email

Esta entrada está disponible en: Castellano (Castellanu)