Home > Comunicaos > Na vuelta a les aules, proponemos Plan de Choque Educativu

Na vuelta a les aules, proponemos Plan de Choque Educativu

NA VUELTA A LES AULES EN SEPTIEMBRE, SUATEA PROPÓN UN PLAN DE CHOQUE EDUCATIVU

Na mañana de güei, 16 de xunetu de 2020, celebróse una Mesa Sectorial d’Educación p’axustar el protocolu d’organización de l’actividá docente pal cursu 2020/21.

L’Alministración presentó a les Organizaciones Sindicales un borrador de propuesta que dende SUATEA consideramos imprecisu, contradictoriu en dellos aspeutos, y que nun respuende polo xeneral a les necesidaes de la comunidá educativa, tanto dende’l puntu de vista de la salú pública, aplicando midíes de prevención y control de la pandemia nos centros educativos y, a la vez, cumplir los oxetivos educativos y de socialización que favorezan el desenvolvimientu del conxuntu del alumnáu y que garanticen la equidá.

La pandemia punxo de manifiestu cómo les desigualdaes sociales aprucen y el sistema educativu foi un claru reflexu de la situación. Les llimitaciones que supunxeron la fienda dixital d’una parte del alumnáu, y también la falta de sociabilización que supón la enseñanza a distancia, en SUATEA fáennos concluyir que foi una solución improvisada a un problema non previstu, pero qu’en nengún casu puede plantegase como sistema habitual pa desenvolver l’actividá académica. Por eso, siempres que la situación sanitaria lo permita, plantegamos que l’actividá lectiva se desenvuelva de manera presencial y, amás, tienen d’ufiertase los servicios complementarios de tresporte y comedores escolares. Ye imprescindible identificar y prevenir los riesgos d’esposición a la COVID-19 de los distintos puestos de trabayu y actividaes que se desenvuelven nos centros.

Énte l’anunciu del gobiernu de que se van a destinar a educación 2.000 millones d’euros de fondos europeos contra la pandemia, dende SUATEA, entendemos que la partida que correspuenda a Asturies d’esta dotación estraordinaria tien de destinase íntegramente a la enseñanza pública, que ye la que mayores recursos precisa p’atender les necesidaes del alumnáu más vulnerable.

La vuelta a les aules en septiembre va tar marcada por una pandemia activa y ye menester dexar afitaes midíes de seguridá, lo qu’esixe un esfuerzu enorme a un sistema educativu públicu yá de por sí afogáu. Énte l’entamu d’un nuevu cursu, va ser necesariu combinar  la educación calidable, les midíes de seguridá sanitaries, los derechos del alumnáu, del profesoráu y de les families. Dende SUATEA faemos la propuesta d’un PLAN DE CHOQUE EDUCATIVU, dotáu de financiamientu abondu y de personal pa executalu. Nesta emerxencia educativa precísense recursos   pa garantizar el derechu a la educación del alumnáu y una verdadera educación inclusiva; garantizar el derechu a la salú; avanzar escontra la igualdá d’oportunidaes y la equidá pa lluchar contra les desigualdaes sociales y educatives; ameyorar les condiciones llaborales del profesoráu; diseñar un plan de formación del profesoráu y ellaborar un plan d’infraestructures educatives p’afaer los centros a les nueves necesidaes educatives y sanitaries. 

Les propuestes incluyíes nesi Plan de choque educativu sedríen les siguientes:

1.         Amenorgamientu de ratios. Na propuesta de l’Alministración nun hai cambeos nes ratios d’alumnáu per aula de la situación normal. Dende SUATEA, proponemos p’Asturies que los grupos d’alumnáu nun sían penriba de 12/15 alumnos/aes por aula. La ratio d’alumnáu per aula y la so distribución espacial son los factores esenciales que van determinar tanto la proteición de la salú de la comunidá educativa como les necesidaes de plantiya.

2.         Tutoríes: dende SUATEA proponemos que les Tutoríes sían de 3 hores en Primaria, Secundaria y Bachilleratu. Nos casos de grupos con alumnáu de más de 15 persones, plantegamos un sistema de Cotutoría con dos docentes.

3.         Amenorgamientu de la xornada lectiva. 23 hores lectives pa Educación Infantil y Primaria.  Ye necesariu l’amenorgamientu del horariu llectivu p’afaese a la previsible situación de combinación de l’actividá llectiva presencial y telemática. Por ello, les 18 hores llectives del Cuerpu de Secundaria y Formación Profesional tienen de ser reales evitando situaciones como la d’esti cursu nes que bona parte de la plantiya tenía más de 18 hores lectives.

Consideramos imprescindible l’amenorgamientu del horariu lectivu del profesoráu de Educción Infantil y Primaria a 23 hores. El Ministeriu encamentó 18 hores pa Secundaria y 23 pal Cuerpu de Maestros, pero n’Asturies caltienen les 25.

4.         Material tecnolóxico.

Ye imprescindible que profesoráu y alumnáu cuenten con ferramientes pa trabayar a distancia: ordenadores, conexón y la formación afayadiza nel usu de nueves tecnoloxíes. Tien de priorizase l’atención al alumnáu más desfavorecio, igual que ye necesario apurrir soluciones de conectividá y potenciar la formación del profesoráu nel usu de nueves tecnoloxíes preferentemente n’horariu lectivu.

Igualmente, hai que potenciar la figura de quien coordina les TIC en cada centru, con una medría de la dedicación horaria efectiva. Tamién hai que facilitar la formación familiar naquellos casos  que cunten con menores que nun son autónomos en competencia dixital.

Per otra parte, dende SUATEA apostamos pol fomentu d’aplicaciones y sistemes operativos llibres y gratuitos.

5.         Información y formación en prevención de riesgos

Ye necesario formar a tol profesoráu en prevención de riesgos. Sedría conveniente la presencia con calter permanente de personal sanitario especializao en cada centru, amás de personal técnico en salú llaboral y prevención de riesgos cola creación d’una Comisión de Salú encargada de coordinar y dirixir les midíes a aplicar.

Consideramos tien de dotase al profesoráu d’equipos de protección frente a la Covid-19 y dexar afitaes midíes d’información (cartelos, pegatines, xeles desinfestantes, midíes d’usu n’aules y espacios comunes, etc.)

Los centros d’Educación Especial tendrán de cuntar con protocolos propios afechos a les necesidaes del so alumnáu.

Tocantes a les persones d’especial vulnerabilidá (con enfermedaes respiratories, tratamientos por cáncer, inmunodeprimies, mayores de 60 años, etc.) consideramos que la Conseyería tien d’esixir a Función Pública y a Prevención de Riesgos xuna actuación cuidadosa y preventiva. Énte una situación estraordinaria, les midíes nun pueden ser rutinaries, encamentando prevención xenérica.

6.         Plan d’infraestructures p’afaer los centros a les nueves necesidaes educatives y sanitaries. 

7.         Programación didáctica de cursos y árees. L’Adaptación de los currículos y les programaciones de los cursos” que señala’l documentu del Ministeriu, ye otra esixencia ineludible pal próximu cursu.

L’entamu de cursu tien de dir acompañáu d’una detección inicial de les necesidaes educatives de cada alumna o alumnu, tres la suspensión de l’actividá llectiva presencial dende mediaos de marzu. Ha de tenese en cuenta la importancia de la recuperación física y emocional. Ye vital la intervención de los equipos d’orientación, que tendrán de ser reforzaos.

8.         Normativa que regule les condiciones llaborales de la docencia telemática.

La posibilidá d’un nuevu confinamientu que nos lleve -otra vegada- a un escenariu de teletrabajo, va riquir d’una normativa que regule les condiciones llaborales d’esta modalidá de trabayu.

Esta normativa tien de contemplar:

  • ­El suministru d’equipos informáticos y pagu de les conexones a Internet d’alta velocidá.­
  • Lliberación d’horariu lectivu pa formación en TICS
  • ­Profesoráu de sofitu pa siguimientu de les  xeres telemátiques y prestación d’ayuda al alumnáu y/o families.
  • ­ Amenorgamientu significativu de les ratios de los grupos, yá señalada antes.
  • ­Amenorgamientu de los horarios llectivos envede los complementarios pa preparación de xeres docentes: programación, adaptación de conteníos y metodoloxía, busca de recursos dixitales, preparación de les sesiones y actividaes, etc.
  • ­L’horariu de teletrabayu nun va poder ser penriba del establecíu pal presencial y tendrá de realizase, con calter xeneral, en xornada mañanera.
  • ­Tendrán de tomase midíes que favorezan la conciliación de la vida familiar.
  • ­Sofitu específicu del alumnáu de NEAE y socialmente desfavorecido.

Uviéu 16 de xunetu 2020

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344