Na Conseyería nun-yos presta que’l profesoráu vote

SUATEA DENUNCIA QUE LA CONSEYERÍA D’EDUCACIÓN BOICOTEA LES ELECCIONES SINDICALES DEL 4 D’AVIENTU

SUATEA denuncia que’l boicot de la Conseyería d’Educación al desenvolvimiento de les elecciones sindicales, que se van celebrar el 4 d’avientu que vien, al aprebar unes Instrucciones que vulneren los derechos fundamentales.

L’empecinamientu de l’Alministración asturiana en regular por igual les elecciones sindicales en tol sector públicu (sanidá, educación y función pública), escaez que cada sector tien les sos propies particularidaes y que nel sector educativu estes Instrucciones nun van valir pa regular, sinon tolo contrario, yá que van torgar el derechu a votar y van xenerar problemes d’organización nos centros educativos.

D’una parte, pretenden que la dirección de cada centru educativu arbitre medíes o turnos necesarios p’acudir a votar. N’elecciones anteriores, suspendíense les clases les dos postreres o primeres hores en tolos centros col envís que’l profesoráu pudiere exercer el so derechu al votu, hai que tener en cuenta qu’hai meses electorales que tán a dellos kilómetros de distancia del centru educativu. Na práctica, esta nueva midía qu’imponen va suponer un caos organizativu, especialmente no centros grandes onde’l censu electoral llega a superar la centena y que va facer imposible que les direcciones de los centros sean a garantizar el derechu al votu del profesoráu y l’atención al alumnáu.

D’otra mena, desanicien el permisu retribuíu del día inmediatamente posterior a la xornada de votación a tolos Interventores. Teniendo en cuenta que les meses electorales van zarrar a les 7 de la tarde, y que se seguío va realízase’l cómputu de votos y tolos trámites electorales (confección y entrega d’actes) y que munchos interventores tán a munchos kilómetros de la localidá onde residen, entendemos qu’hai un empecinamientu en poner torgues al desenrollu del procesu. Amás, ye la única Comunidá Autónoma na que los Interventores nun van disponer d’esti permisu.

Pa rematar, van obligar a les persones que vayan exercer el so derechu a votu a presentar nel so centru’l xustificante de tener votao nel qu’apaeza la hora a la que se fae efectivu esi votu. Esto implica que’l profesoraáu va tener que comunicar al centru si va votar o non, lo que vulnera la so llibertá a exercer lo que cada persona considere más oportuno: votar o abstenese.

Por toes estes razones, dende SUATEA nun somos a comprender l’empecinamientu de l’Alministración asturiana en torgar un procesu que lleva años desenvolviéndose con total normalidá y que un necesitaba de nengún cambéu significativu, a nun ser que lo que se tea ye mazcaritando un intentu de disuadir y cohartar al profesoráu que quiera exercer el so derechu a votu. Les modificaciones impuestes suponen una perda de derechos pal profesoráu, dalgo que cuesta entender cuando proceden d’un gobiernu que se diz llamar socialista. Por toes estes razones, dende SUATEA tenemos les Instrucciones nes manes de los nuestros servicios xurídicos, nun vamos permitir que se vulneren derechos fundamentales al profesoráu asturianu.