Home > Comunicaos > Midíes que dean estabilidá a los centros

Midíes que dean estabilidá a los centros

PROPUESTA DE MIDÍES QUE DEAN ESTABILIDÁ A LOS CENTROS DOCENTES DE MALA COBERTORIA

Ayeri (17/04/2018), el Conseyeru d’Educación, Genaro Alonso, declaró na Comisión d’Educación del Parlamentu asturianu que la Conseyería ta estudiando establecer midíes que garanticen la estabilidá de les plantiyes de los centros, especialmente n’aquellos de mala cubrición por tar en zones alloñaes de los grandes núcleos de población. Pa ello, propón dar más puntos al profesoráu interino que pase siquier cuatro años nes zones rurales, pos, reconoz, ye menester amenorgar la elevada rotación y facer más curiosos estos puestos de mala cubrición.
Dende SUATEA, celebramos que’l conseyeru reconoza qu’hai qu’amenorgar la elevada rotación, de siguío esti sindicatu denunció que l’alcuerdu d’interinidá d’Asturies favorez la rotación y la inestabilidá.

Rescampla’l perxuiciu que causa nestos centros la escesiva movilidá del profesoráu y tamos d’alcuerdu en que deben  diseñase midíes que fomenten la continuidá del personal docente nos mentaos claustros. Pero nun compartimos la solución que propón de premiar con más puntos a los/les docentes que permanezan nestos centros mientres cuatro años, esa midida yá s’aplica anguaño a los puestos d’especial dificultá y siguen ensin ser atrayentes pal profesoráu. El Conseyeru refirióse a qu’en delles Comunidaes, como Canaries, yá s’apliquen midíes nesta llínia. Efectivamente, en Canaries aplícase’l programa PROMECI (Programa de Meyora de la estabilidá de Claustros Docentes Inestables), que pretende garantizar la estabilidá de los equipos docentes combinando una serie de midíes, principalmente la ufierta d’estabilidá per cuatro años al profesoráu interín que se comprometa cola so continuidá nestos destinos; amás, súmase qu’en Canaries  garantízase la estabilidá hasta la xubilación del profesoráu interín de más de 55 años y cinco años de servicios. La propuesta de l’Alministración asturiana tien de dir nesa mesma llínia, esto ye, dotar d’estabilidá a les persones que se comprometan a permanecer nesos puestos mientres dellos cursos, porque “premiar” con más puntos en nengún casu va arreglar el problema.
Polo tanto, dende SUATEA consideramos que l’actual Alcuerdu d’interinidá non yá nun sirve p’aplicar midíes que dean estabilidá a los centros educativos y al profesoráu interín, sinón que fomenta la rotación, que curiosamente’l mesmu conseyeru reconoció na so intervención que ye elevada enforma. Por ello, encamentamos a la Conseyería a que d’una vez abra la negociación d’un nuevu alcuerdu d’interinidá que contemple, ente otres, estes propuestes de meyora.
Recordamos que SUATEA convoca una FUELGA’l próximu martes, 24 d’abril, pa esixir precisamente un plan d’estabilidá pal profesoráu interín, amenorgar la rotación y torgar los centenares de despidos que prevemos pa esti branu.

Uviéu, 18 d’abril 2018

Esta entrada tamién se puede consultar en: Castellanu