Mesa de NON negociación

Na mañana de güei, martes 21 de xunetu, celebróse la segunda Mesa Sectorial encargada d’axustar el protocolu d’organización de l’actividá docente pal próximu cursu 2020-21. Na xunta anterior aldericóse sobre’l borrador presentáu pola Conseyería d’Educación que foi cuestionáu por toles organizaciones sindicales.

Daquella, l’Alministración aseguró que’l tiempu de negociación taba abiertu y refugó les acusaciones de nun tener nenguna voluntá negociadora. Dende SUATEA señalemos que la prueba de la verdá pasaba por presentar un testu alternativu qu’asumiera, siquier, dalguna de les distintes propuestes presentaes. Nesi sentíu, les nueses aportaciones diben recoyíes nel comunicáu qu’ellaboremos nel que falábemos de la necesidá d’un Plan de Choque pal sistema educativu asturianu en tiempos de pandemia.

Dientro de toles midíes que, de forma detallada recoyía la nuesa propuesta, esistíen delles llínees coloraes de les que SUATEA vien falando yá dende la pasada primavera como son la necesidá d’ampliar plantiyes y l’amenorgamientu de les ratios d’alumnáu nes aules pa garantizar la seguridá sanitaria nos centros.

Na xunta de güei, l’Alministración presentó un nuevu documentu qu’apenes recueye cambeos. Otra vuelta, toles organizaciones sindicales refuguemos la propuesta.

Dende SUATEA creemos que tamos énte un asuntu d’especial trescendencia y que’l Gobiernu asturianu tendría de tomase bien en serio la situación. Esta pandemia esixe recursos económicos estraordinarios y, tanto’l Gobiernu como la Conseyería, tienen de facer un esfuerzu pa evitar que l’entamu del cursu 2020-21 puea convertise nel riesgu principal de los rebrotes y contaxos nel nuesu territoriu. Mientres esto nun se resuelva, la Conseyería d’Educación atopase nuna situación complicada.

Lamentablemente, nun vemos datos que mos dexen ser optimistes. Cuanto más aportunamos na necesidá de reforzar plantiyes, mayores son los datos que nos lleven a tarrecer lo peor. Asina, nel día d’ayeri, col entamu del procesu de convocatoria pa l’axudicación de vacantes ente’l profesoráu interín, conocimos una desagradable sorpresa: les places ufiertaes, en llugar d’ampliase, como venimos pidiendo de manera insistente, amenórguense en numberoses especialidaes, no que cinca a los Conservatorios de Música qu’apaecen ensin places d’interinidá y, de forma significativa, en casos como Audición y Llinguaxe (AL) y Pedagoxía Terapéutica (PT), que son la base del trabayu d’atención a la diversidá.

Toa esta situación ta llevándonos al caltenimientu de la incertidume ente’l profesoráu, el malestar dientro de los equipos directivos de los centros y una creciente medría del nerviosismu ente les families que ven con medrana que, ante l’entamu del nuevu cursu escolar, siguen faltando midíes que puedan garantizar el menor riesgu posible de contaxos ente l’alumnáu.

Énte esta situación, dende SUATEA queremos aportunar, como yá fiximos na primer xunta, en que nun podemos refugar empecipiar el cursu llamando a la movilización pa denunciar l’adopción de midíes que consideramos claramente insuficientes p’actuar contra la posibilidá d’e contaxos por coronavirus na Escuela Pública asturiana, poniendo en riesgu la salú d’alumnáu, families y profesoráu.

  Uviéu/ Oviedo 21 de xunetu 2020