Manifiestu de l’asamblea del profesoráu itinerante

Aconceyaos n’asamblea nel institutu Doctor Fleming d’Uviéu, el vienres 15 de xineru de 2016, el profesoráu itinerante de los centros públicos asturianos quier facer públicu’l siguiente

MANIFIESTU:

Nel presente cursu, la Conseyería d’Educación Cultura y Deportes ensin consultar a les organizaciones sindicales, nin al profesoráu, ta aplicando cambeos nes condiciones de trabayu del profesoráu itinerante.

Los impresos de solicitú d’indemnización per kilometraxe tienen de cubrise cada dos meses en cuenta de mensualmente como veníamos faciéndolo hasta agora, lo que trai de resultes que se cobren con un retrasu equivalente (un mes más tarde que’l pasáu cursu).

El personal itinerante realizamos los cálculos de kilómetros percorríos aplicando l’artículu 5.1 del Alcuerdu Sobre Condiciones de Trabayu del Profesoráu Itinerante al Serviciu del Principáu d’Asturies, suscritu ente l’Alministración del Principáu d’Asturies y les organizaciones sindicales nel añu 2001 nel que se diz: ” El cálculu del Kilometraxe a efectos de la indemnización económica por desplazamientu, va facese dende la localidá onde ta’l centru de destín pal que fue nomáu y van computase dende’l primeru hasta’l postreru de los desplazamientos de la xornada, esto ye, el total de kilómetros d’ida y vuelta percorríos”. La conseyería unviónos escritu a los/les itinerantes solicitándonos que rectificáramos los nuesos cálculos esaniciando’l percorríu inicial dende la localidá onde ta’l centru del nuesu destín a l’aula onde empecipiamos la impartición de la nuesa docencia, y l’eliminación tamién del percorríu dende la última aula onde rematamos la nuesa docencia al centru de destín. Ello supón un amenorgamientu sustancial de la indemnización económica por itinerancia y l’incumplimientu flagrante d’un artículu fundamental del mentáu alcuerdu.

Si la indemnización económica tenía la función de compensar en ciertu mou la condiciones especiales (de penosidá) del nuesu trabayu como profesoráu itinerante -antemanamos dineru del combustible a l’alministración, ponemos el nuesu vehículu y la nuesa persona como conductores a disposición d’un serviciu públicu-, el so drásticu amenorgamientu trai de resultes una amenorga notable de los nuesos ingresos y por tanto de les nueses condiciones llaborales. Too ello podría tener de resultes un aumentu de la intestabilidad de la plantiya, tanto pola non elección de la condición d’itirenante per parte del profesoráu interín, como pol éxodu de los docentes definitivos por aciu del concursu de tresllaos. To ello perxudica’l futur de la escuela rural, especialmente al alumndáu que queda ensin recibir l’atención educativa cola calidá a la que tienen derechu.

Por too ello, el profesoráu itinerante esiximos:

•El caltenimientu del cálculu de los kilómetros de itinerancia como se venía faciendo hasta l’actualidá contabilizando: los Kilómetros dende’l centru de destín hasta’l llugar onde s’empecipie la docencia y los kilómetros dende’l llugar onde se termine la docencia y el centru de destín.

•El caltenimientu, como se venía faciendo hasta esti cursu, de la periodicidad mensual de presentación del boletín de solicitú d’indemnización por itinerancia.

•Un aumentu na cuantía de la indemnización por kilómetru.

•La considerancia de los puestos itinerantes de les zones rurales d’Asturies como puestos de fácil desempeñu.

•La simplificación na tramitación de les ayudes por accidente y completar el seguru que tenga’l profesoráu hasta una cobertoria a tou riesgu con sustitución de vehículu accidentáu mientres el so arreglu.