Manifestación xueves 1º Mayu 12:30 na Plaza L’Humedal. Xixón

Semeyes de la manifestación en Xixón (Flickr)

Manifiestu 1º de mayu

L’ésitu de les Marches de la Dignidá que confluyeron en Madrid el pasáu 22 de marzu demostró que la clase trabayadora y los sectores populares tán dispuestos a salir a la cai. Anque dende’l réxime lleven años intentando narcotizar a los pueblos, antes ufiertando espeyismos y agora al traviés del mieu, la mayoría social nun traga, nin va tragar, coles recetes que nos vienden el Gobiernu y la Troika como soluciones a la crisis qu’ellos mesmos crearon.

Ye ciertu que la capacidá colosal de manipulación del enemigu llogró instalar el mieu n’amplies capes del pueblu y tamién de la clase obrera. Pero nun ye menos ciertu qu’el 22M demostró que la unidá afilvanada dende embaxo, dende la pluralidá, dende la reconocencia de los Pueblos, cola suma del sindicalismu alternativu, los movimientos sociales y les organizaciones anticapitalistes fizo saltar les alarmes nes cloaques del réxime borbónicu. La evidencia ye l’intentu de despintar y criminalizar la movilización en Madrid.

Güei, les corporaciones sindicales del sistema son el tapón más importante, la gran torga pa que la clase trabayadora desendolque la so capacidá de llucha pa frenar al enemigu. Esto, nun momentu históricu onde l’acción alienante capitalista fizo sustituyir los valores y los principios pola vanalidá, la competitividá y el consumu. Cuando los medios de mases, preseos esenciales del mesmu sistema tienen la capacidá impune de manipuliar y desinformar como nunca, ye cuando’l verdaderu sindicalismu de clase tien que tar al altor.

El sistema agónicu que nos ta desaposiando de tolos nuestros derechos; que coles sos polítiques neolliberales déxanos nel paru, con seis millones de persones paraes, na precariedá o esclusión social y que prime a la clase trabayadora y a los pueblos nun se va morrer, hai que matalu. El capitalismu y los sos preseos de dominación, conscientes de los peligros que-yos vienen, preparen nuevos recetarios económicos, lexislativos o represivos pa caltener los sos privilexos. Les oligarquíes qu’apoderen el mundu sí tán xuníes, na lóxica neolliberal pa vencer y caltenenos nel pozu del mieu. La respuesta nun pue ser otra que la unidá de sectores, de lluches, de pueblos. Namás asina vamos poder romper les cadenes de la opresión de clase y nacional.

El sindicalismu de clase y alternativu tien d’escribir la so estratexa de llucha obrera y d’acción sindical. Nesta coxuntura histórica escepcional imponse la vertebración d’un ampliu frente obreru y popular, que faiga qu’amplios sectores de la clase obrera y del pueblu, desencantaos y decepcionaos pola traición sindical y pol réxime nacíu cola Reforma Política, vuelvan creer nes nueses capacidaes pa enfrentase y paralizar les polítiques de los gobiernos de la Troika. Esta ye la síntesis del nuesu mensaxe esti 1º de Mayu.

Güei como nunca, les nueses aspiraciones y derechos, l’empleu, la salú llaboral, les distintes prestaciones, les polítiques d’igualdá, la negociación colectiva, los marcos propios de relaciones llaborales, etc., van ser papel moyáu, cuando non lluches destinaes al fracasu, si estes aspiraciones y reivindicaciones nun les ensertamos nesi músculu d’unidá obrera y popular que tien que perdurar dempués del 22M. Pos esta fecha ye l’empiezu pa que’l mieu camude de bandu.

¡1º de mayu: xunir les lluches, la Dignidá sigue na cai!