Los tribunales avalen la esclusión de les nuestres llingües na E. Infantil

El Tribunal Superior de Justicia de Asturies avala la decisión de la Conseyería d’Educación d’Asturies y, poro, del Gobiernu d’Asturies de nun recoyer rnengún conteníu de Llingua asturiana nin gallego-asturianu nel “Decreto 56/2022, de 5 de agosto, por el que se regula la ordenación y se establece el currículo de la Educación Infantil en el Principado de Asturias (BOPA 12-VIII-2022) de la Consejería de Educación del Principado de Asturias”.

Contra esti decretu presentemos dende SUATEA un recursu contenciosu-alministrativu pidiendo la nulidá del mesmu por vulneración del artículu10 de la “Ley 1/98, de 23 de marzo, de uso y promoción del bable/asturiano “por nun recoyer nenguna referencia o mención que permita considerar la llingua asturiana como parte integrante del currículo nesta etapa, nin nes sos disposiciones nin nel so preámbulu. Esti fechu nun lu niega en nengún momentu de la sentencia, colo que se reconoz lo que ye evidente: la inexistencia nel currículu d’Educación Infantil d’Asturies de nenguna mención nin conteníu dalu de les nuestres llingües. Cuestión que contravién, dende’l nuestru puntu de vista y dende’l d’una llectura comprensiva lliteral, clarísimamente lo mandao pol mencionáu artículu 10 de la Lleid’Usu: “En el ejercicio de sus competencias, el Principado de Asturias garantizará la enseñanza del bable/asturiano en todos los niveles y grados, respetando no obstante la voluntariedad de su aprendizaje“. Ye importante solliniar qu’esti artículu forma parte del Capítulu III. Enseñanza y dientro d’elli esti artículu llámase 10.Currículu. Poro, regula la Enseñanza y, dientro d’ella, específicamente’l currículu, ordenando que tien de recoyer la llingua asturiana en tolos niveles y graos. Emplegando la terminoloxía d’anguaño, que nun se correspuende cola emplegada nel 98 pola llei d’Usu,  la Educación Infantil (EI) ye una etapa educativa que tien dos ciclos y cada ciclu 3 niveles. Anque la terminoloxía nun ye la mesma, cualisquier mortal entiende que l’espíritu de la llei, cuando se refier a tolos niveles y graos, inclúi a toles etapes educatives al tar éstes formaes por distintos niveles. La EI ye una etapa educativa, forma parte del Sistema Educativu xeneral y, polo tanto, el so currículu vese comprometíu polo dispuesto nesti artículu 10.

Al aviesu, el tribunal avala la posición de la Conseyería Educación dando los siguientes argumentos “de derecho”:

• . “(sic)…es excluida precisamente en atención a la especial configuración de dicha etapa educativa, en áreas integradas, y no en materias específicas, y sin posibilidad de establecimiento de nuevas áreas o materias optativas por parte de la Administración autonómica“. Esto ye, el tribunal preconcibe que la única manera que tien la llingua asturiana d’integrase nel currículu d’EI ye como una materia fuera de les reglamentariamente establecíes. Sicasí,  los conteníos de les nuestres llingües, igual que tán integraos cualisquiera otros  correspondientes a distintes categoríes de conocimientu, como son l’Inglés, les matemátiques, la música o’l dibuxu, podríen y deberíen integrase nel “área de Comunicación y representación de la realidad” ensin formar una área o materia optativa aparte. Reseñar que nin la lleid’Usu nin el nuestru Estatutu d’Autonomía pauten la optatividá de les enseñances de les nuestres llingües, sinón la so voluntariedá como única condición pa recibiles.
• (sic)” ...la enseñanza infantil no forma parte de la básica y que por sus características, entre ellas la edad de los alumnos, se propone el aprendizaje de propuestas globalizadas y no materias específicas”. Vuelve a repitise l’argumentu anterior que ye la esencia del fallu en contra de la nuestra demanda y amiéstase como complementariu que la EI nun forma parte de la enseñanza básica. Entendemos que se confunde equí la terminoloxía empegando’l términu básica pa referise a que la EI ye voluntaria, non obligatoria, pero ye indiscutible que la EI forma parte de la educación básica, puesto que ye la primera etapa de la formación reglada y fundamental pa construir postreros aprendizaxes, como bien saben el 96,6 % de los padres y madres que nel Estáu español escolaricen a les sos fíes y fíos nesta etapa fundamental. Amás la Llei d’Usu nun fai nenguna clasificación de la enseñanza en básica, obligatoria o voluntaria, sinón niveles y graos y en toos ellos tien de garantizase la enseñanza del bable/asturiano. Poro, tando la EI formada por niveles o graos tien d’enseñase. Lo que nun diz ye cómo. Presuponer como fai la Conseyería y el Tribunal que tien d’impartise como una materia aparte, inintegrable nes aries curriculares establecíes, constitúi un apriorismu tramposu que val pa safase de lo mandao por una llei asturiana, pues les enseñances de les nuestes llingües son perfectamente integrables na EI cumpliendo tolos principios pedagóxicos establecíos, como lleva demostrando cuantayá el profesoráu que los lleva impartiendo nes escueles asturianes.

Tolo espuesto enantes demuestra la falta d’interés  del Gobiernu d’Asturies nel avance de la normalización llingüística, tamién nes aules, faciendo rescamplar la hipocresía del PSOE cuando diz tar pola oficialidá de los nuestros idiomes y el Gobiernu d’Asturies, al través de la Conseyería d’Educación, nin siquier inclúi na etapa d’EI la enseñanza de les nuestres llingües, conociendo como conoz qu’esta etapa ye esencial nel aprendizaxe de los idiomes y, polo tanto, nel caltenimientu de los propios d’Asturies.

El Secretariáu de SUATEA

N’Uviéu a 1 de xunu de 2023