Home > Comunicaos > Los STEs-I énte la formación del nuevu gobiernu

Los STEs-I énte la formación del nuevu gobiernu

LA FORMACIÓN DE GOBIERNU, PUNTU DE PARTIDA DE LA RECUPERACIÓN EN MATERIA EDUCATIVO

El nuevu gobiernu ufierta un programa que tien de ser aniciu de nueves polítiques que garanticen el progresu y la cohesión en materia educativo

            La decisión del Congresu de da-y la confianza al candidatu a la Presidencia del gobiernu, Pedro Sánchez, pa formar gobiernu ye una bona noticia pal mundu educativu que, de primeres, fai posible que desapaeza’l bloquéu esistente hasta agora. Si superar la inactividá que’l Ministeriu d’Educación caltuvo dende febreru al tar en funciones, ye yá de por sí positivo, el fechu de que, amás el programa presentáu, frutu del Alcuerdu PSOE-Xuníes Podemos, recueya importantes puntos reivindicaos dende va tiempu pola nuesa Confederación, ye alentador.

            N’efeutu, la derogación de la LOMCE, la eliminación del conciertu educativu a los centros que segreguen por razón de sexu, la llimitación de práctiques abusives a los centros subvencionaos con fondos públicos, el que la nota de relixón nun cuente a efectos académicos, la estensión del ciclu de 0 a trés años na rede pública, la estensión de la gratuidá a llibros, comedores y material escolar a families en riesgu d’esclusión social, la meyora del sistema de beques y la propuesta d’amenorgamientu de tases nel ámbitu universitariu, son toes elles midíes que van cuntar col sofitu de la Confederación de STEs-i.

            Hai tamién otres propuestes que, según nós, tienen d’esplicase con detalle o ameyorase: la referencia a la estabilidá docente tien que vese en midíes concretes, igual que la revisión del contratu d’interinidá, “evitando’l so usu abusivu”. El Plan estratéxicu de la Formación Profesional Dual puede traer peligros importantes pa les condiciones llaborales de les y llos trabayadores en práctiques y, a última hora, la medría de los recursos públicos destinaos a la educación y beques que’l programa establez nel 5% del P.I.B. nel añu 2025, tien d’algamase a lo llargo d’esta llexislatura, como mui tarde.

            Si a ello añedimos que les propuestes educatives inscríbense dientro d’un proyectu que potencia les polítiques feministes, promueve les acciones pa combatir el cambéu climáticu, fomenta la cohesión social, trata d’aumentar la xusticia fiscal y plantega recuperar derechos llaborales, la perspectiva política que se dibuxa pa esta llexislatura recién empecipiada tien de movenos a recibir con optimismu l’acción que puede desenvolver el nuevu gobiernu, en cuantes se forme. Les torgues van ser –de xuru- abondes, pero l’esfuerzu pue merecer la pena.

            Eso sí, nun hai tiempu que perder. Son demasiaos los meses que la inactividá política convirtió n’oportunidaes esbardiaes. Hai temes asgaya por resolver. El Ministeriu d’Educación, en cuantes se forme’l gobiernu, tien de ponese manes a la obra pa empobinar procesos que tienen de desenvolvese urxentemente. El primeru d’ellos, la normativa que rixa la convocatoria de les Ufiertes d’Empléu Públicu previstes pa esti 2020. El Ministeriu tien de convocar bien ceo la Mesa de Negociación del Personal Docente, pa que a lo llargo d’esti mes de xineru puea llegase a un alcuerdu pa que la Convocatoria d’oposiciones sía lo más xusta posible y el so desendolcu faiga posible que l’accesu a la función pública docente respete los derechos del personal interino, de la que garantice la selección de los meyores docentes.

Secretariáu de STEs-intersindical

Madrid, 8 de xineru de 2020

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344