Los sindicatos firmantes van participar na manifestación estatal de personal público n’abusu temporalidá

El nuevu Ministru de Política Territorial y Función Pública, Miquel Iceta, nun escucha les reivindicaciones de los colectivos d’emplegaos públicos n’abusu de temporalidá nin tampoco a los sindicatos que compartimos les sos reivindicaciones.

Namás s’aconceya colos sindicatos que roblaron los alcuerdos de 2017 y 2018 con Montoro, polos que se desenvuelven unes supuestes ufiertes estraordinaries d’estabilización. Alcuerdos que nun son otra cosa qu’ERES tapaos, pa echar a un personal interino que mientres años tuvo trabayando, ensin opciones nel afitamientu del empléu, cuidao que les alministraciones públiques apostaron pola precariedá nes sos plantiyes.

El Ministru tampoco fai casu de les múltiples proposiciones non de llei y de llei que se presentaron a los distintos parllamentos autonómicos y nel Congresu, onde se pide’l cambéu del Estatutu Básicu del Emplegáu Públicu pa sancionar a les alministraciones abusadores y, especialmente, pa buscar una solución satisfactoria que protexa los/es trabayadores víctimes del abusu, facilitando l’afitamientu del empléu.

En cuenta d’ello namás llanza un globu sonda sobro l’ampliación d’estes ufiertes mal llamaes d’estabilización y suxere que la sanción a les alministraciones puede consistir n’amortización de les places que nun sían cubiertes nos plazos establecíos llegalmente. Esto ye, más de lo mesmo que yá tenemos y que’l Tribunal de Xusticia de la Unión Europea yá refugó como mecanismu de sanción.

Ye por ello, que too ta por faer, que pensamos que ye necesaria la movilización del personal n’abusu de la temporalidá de toles alministraciones y de tolos sectores y asina primir al Ministeriu pa que dea nel cambéu del Estatutu Básicu del Emplegáu públicu, facilitando l’afitamientu del trabayu a tol personal público víctima del abusu.

Poro, les organizaciones firmantes axúntense a la convocatoria de manifestación que fixo la Coordinadora Estatal de Personal Público Temporal (CEPPT), pal próximu día 22 de mayu en Madrid.

Logo 2021

Print Friendly, PDF & Email