Comprometíos cola atención a la diversidá sexual

FE-CCOO, FETE-UGT, STES y FELGTB trabayen por defender el respetu a la diversidá sexual y a la identidá de xénero y la erradicación de la LGTBQIfobia nes aules.

Con motivu de la celebración del 28 de xunu, Día Internacional del Arguyu lgtbqi (llesbianes, gais, tressexuales, bisexuales, queer y intersexuales), FE-CCOO, FETE-UGT, STES y FELGTB trabayamos y reivindicamos medíes y actuaciones nel ámbito educativu que fomenten el reconocimiento de la diversidá sexual y de la identidá de xénero, al tiempo que prevengan la lgtbqifobia.

Dende’l postreru añu, 2014, les federaciones d’enseñu de CCOO, UGT, el sindicatu STES y la Federación Estatal de Llesbianes, Gais, Tressexuales y Bisexuales trabayamos en comuña nun conveniu de colaboración nes que nos comprometimos a desenvolver delles acciones nel ámbito educativu pa sensibilizar a la comunidá educativa na necesidá d’abordar dende’l respetu la diversidá sexual y la identidá de xénero, asina como desaniciar la discriminación por sexo, orientación sexual o identidá de xénero.

Dos son les realidaes sobre les que ye urxente intervenir pa garantizar la igualdá d’oportunidaes del conxuntu de la comunidá educativa: invisibilidá y lgtbqifobia. Los centros educativos, al igual que’l restu de la sociedá, pesie a los esfuercios fechos y los avances algamaos, inda tienen un llargu percorríu por facer pa ser a garantizar la eliminación de les desigualdaes y la posibilidá de que sean espacios libres y seguros pa les persones lgtbqi o aquelles que nun s’identifiques coles espectatives de xénero socialmente establecíes.

Nestos momentos, la nueva llei educativa, LOMCE, supón un grave perxuiciu pa los avances algamos y demandaos pola sociedá. Nun solo permite segregar moces y mozos pol so sexo y nun únicamente suprime materies como Educación pa la Ciudadanía, que tien conteníos onde se recueye’l respetu y el reconocimiento de la diversidá sexual, sinon que también s’elimina’l calter obligatoriu d’una educación ética basada na formación en valores y en derechos humanos, contribuyendo asina y potenciando la permanencia de prexuicios que siguen xenerando desigualdaes por razón de xénero, diversidá sexual o identidá de xénero.

Por estes razones, estes organizaciones sindicales y FELGTB tenemos un compromisu irrenunciable cola igualdá d’oportunidaes y cola erradicación de cualisquier tipu de discriminación, polo que llamamos al conxuntu de la población a defender los derechos lgtbqi y a combatir y prevenir la lgtbqifobia. Pa esi doble oxetivu, nel ámbitu educativu consideramos necesariu:

• Trabayar la educación afectivo-sexual nes diferentes etapes educatives como parte de la formación integral d’alumnes y alumnos.
• Reclamar la formación inicial y continua del profesoráu sobre estos conteníos.
• Elaborar programes, campañes y materiales didácticos sobre diversidá sexual y identidá de xénero.
• Visibilizar la diversidá sexual y la identidá de xénero nel currículum, nos proyectos educativos de centro y nos planes de convivencia, asina como na realidá diaria del centro.
• Incorporar los derechos lgtbqi nos convenios llaborales, asina como la creación de protocolos d’actuación ante situaciones específiques.

Asina, ratificamos el nuestru compromisu de siguir trabayando pa que los centros educativos sean espacios de llibertá y seguridá, onde toles persones de la comunidá educativa puedan ser, espresase y participar dende la so diversidá y onde se fomente y s’eduque nel respetu pa con quien difier de les normes sociales impuestes de la heterosexualidá y el binarimu de xénero.

Madrid, 24 de xunu del 2015

MANIFIESTU DE LA CONFEDERACIÓN DE STEs-Intersindical