Los presupuestos asturianos escuenden una Plantiya Orgánica fraudulenta

Esta entrada está disponible en: Castellano (Castellanu)

Acaba l’añu y tán a piques d’aprobase los presupuestos d’Asturies. Na propuesta que se va a presentar a la Xunta Xeneral figura un gastu n’Educación de 780.888.951€. Supón una medría insuficiente del gastu en 44 millones d’euros de los que 20 millones son apurríos polos fondos europeos.

Tocántenes a los gastos en personal docente d’Educación presupuéstense los gastos pa un total de 10853 profesor/as fixos (funcionarios/es de carrera) y temporales (funcionarios/es interinos). La plantiya orgánica actual (docentes funcionarios/es de carrera) ta compuesta por 9378 persones y si sigue la tónica de medría de plantiya de los últimos años el so aumentu ye mínimu (una o delles decenes). Pa deducir el númberu de personal interino presupuestao solo hai que restar de los 10853 totales los aprosimao 9378 profesores fixos de los que se va componer la plantiya pa 2022, y el resultáu ye: 1475 profesores interinos/es presupuestaos.

Sicasí, esti cursu 2020/21  contratáronse a primeros de cursu unes 3000 persones interines en vacantes completes par tol cursu. Y surde la entruga énte esta paradoxa ¿Cómo ye que se presupuesta pa 1475 interinos/es y puede pagase a 3000? La respuesta ye cenciella: les aprosimao 1500 persones interines, aparentemente non presupuestaes, tán dientro de la plantiya orgánica. O lo que ye lo mesmo: ta contratándose añu tres d’añu a personal interino pa ocupar puestos de plantiya orgánica.  Ello rescampla l’abusu xeneráu dende va cunatayá na contratación de personal temporal (interinos/es- más del 30% de l’actual plantiya), incurriendo asina la Conseyería d’Educación  en fraude de llei y abusu na contratación temporal del personal, si tenemos en cuenta la directiva europea 70/1999.

Esti fechu supón tamién un fraude na confección de la plantiya orgánica d’Educación, en cuantes que los puestos presupuestaos nesi conceutu nun son cubiertos por funcionariáu de carrera na so totalidá y la partida presupuestaria destinada a la plantiya orgánica ye utilizada pa contratar a personal  en situación de precariedá llaboral: interinos/es a media xornada, con rotación nel empléu, inestabilidá nel puestu de trabayu y encadenamientu de contratos temporales ensin xenerar la so fixeza.

Poro, dende SUATEA :

– Demandamos la inclusión de toos estos puestos de personal abusáu na plantiya orgánica, al traviés del afitamientu nos sos puestos de tol personal interino contrataon’abusu de temporalidá conforme a la citada directiva europea.

El Secretariáu de SUATEA

N’Uviéu a 22 de payares de 2021

Print Friendly, PDF & Email

Esta entrada está disponible en: Castellano (Castellanu)

Vuelta al cursu y cuestión sanitaria.