LOMLOE: ¿Nueves perspectives pa les nuestres llingües?

LOMLOE: ¿Nueves perspectives pa les nuestres llingües?  

En SUATEA, dende la nuestra fundación,  valoramos y respetamos la pluralidá llingüística y cultural del Estáu Español.  N’Asturies cuntamos con dos llingües autóctones o propies, l’ asturianu y el gallego-asturianu. Les dos sufren una situación d’anormalidá democrático-constitucional al nun tar reconocíes como oficiales, lo que supón una clara discriminación nel so estatus llegal en comparanza con otres del Estáu que sí tienen esti reconocimientu. Esta situación  contradiz el mandáu constitucional ya que la Constitución Española nel so artículu 3.2 diz que “Les demás llingües españoles sedrán también oficiales nes respectives Comunidades Autónomes d’alcuerdu colos sos  Estatutos”. Sicasí, tienen el reconocimientu y protección llegal que-yos da’l nuestru Estatutu d’Autonomía nel artículu  4 1. (“El bable gozará de protección. Promoveráse’l so usu, la so difusión nos medios de comunicación y el so enseñu  respetando en toucasu les variantes locales y la voluntariedá nel so deprendimientuje”)  y la Llei d’Usu y Promoción del Bable que desarrolla esti artículu reglamentariamente.

La LOMLOE, a diferencia coles anteriores LOE y LOMCE,  reconoz la esistencia nel Estáu de llingües non oficiales con protección llegal y establez la so inclusión nel sistema educativu d’alcuerdu cola normativa qu’establezan les comunidaes autónomes onde se falen eses llingües (Disposición adicional trigésima octava. Lengua castellana, lenguas cooficiales y lenguas que gocen de protección legal: “Aquellas Comunidades Autónomas en las que existan lenguas cooficiales que no tienen ese carácter en todo su territorio o lenguas no oficiales que gocen de protección legal podrán ofrecerlas en los términos que determine su normativa reguladora.”). Esta disposición en nada cambia la situación de discriminación que llevamos sufriedo, pues nós yá tenemos una llexislación dende hai más de 20 años que nun mos dexa avanzar nel procesu de normalización llingüística y llaboral nel ámbitu educativu. Únicamente da a conocer, implicitamente, a tol Estáu la esistencia de llingües qu’entá nun algamaron el reconocimientu d’oficialidá.   

Coles modificaciones establecíes na nueva llei recupérase la distribución de competencies ente l’Estáu y les Comunidaes Autónomes no relativo a los conteníos básicos de les enseñances mínimes, que van riquir el 50 per cientu de los horarios escolares pa les Comunidaes Autónomes que tengan llingua cooficial y el 60 per cientu p’aquelles que nun la tengan, dexando establecer tamién a los centros un porcentaxe del currículu que determinará cada Comunidá Autónoma. Ábrese d’esta forma la posibilidá de reestructurar bona parte del currículu y aumentar la carga horaria y el pesu curricular de les nuestres llingües.

En definitiva, la LOMLOE nel terrén llingüísticu, vuélvemos  al 2006 col marcu regulatoriu yá esperimentáu de la LOE y demuéstramos que’l camín más curtiu y menos abegosu pa dexar atrás l’estancamientu d’estos años y llegar a la normalidá llingüística pasa por declarar la OFICIALIDÁ. Sicasí, l’Alministración Asturiana y, específicamente, la nuestra Conseyería Educación tienen el deber d’aprovechar  esti aumentu nes sos competencies y la  reestructuración  del currículu impuestos pola nueva llei, p’allegamos lo máximo posible a la situación d’Oficialidá. Pa ello  ye imprescindible:

– Reconocer les Especialidaes d’Asturianu y Gallego-Asturianu na so reglamentación al mesmu nivel que toles otres especialidaes y colos mesmos efectos alministrativos: consideración de personal funcionario al profesoráu d’esta especialidá, participación en concursu de tresllaos, igualdá salarial, mesma forma d’accesu…

– Esixir  al Ministeriu Educación el so reconocimientu como especialidaes nos términos anteriormente dichos.

– Incluyir los puestos de les nuestres llingües  nes plantiyes orgániques de los centros y nes necesidaes educatives eliminando les medies xornaes.

– Reconocer el fraude de llei cometíu col personal interino qu’imparte estes especialidaes en puestos estructurales y indemnizalo cola fixeza nel puestu trabayu nes mesmes condiciones que’l restu de profesorao interino en situación de fraude. 

– Equiparación curricular de les nueses llingües propies col castellán y la primer llingua  estranxera.

– Cumplimientu de la Llei d’Usu ufiertándo la enaeñanza de les nuestres llingües en toles etapes educatives.

El Secretariáu de SUATEA
N’Uviéu a 27 de xineru de 2021