Home > Aición sindical > #LomceNoEduca. Derogar la LOMCE y paralizar la so implantación

#LomceNoEduca. Derogar la LOMCE y paralizar la so implantación

Diverses organizaciones del movimientu social educativu de tol Estáu, punxeron en marcha una campaña en Twitter pa esixir la derogación de la LOMCE. Esta campaña empecipióse p’aportunar na necesidá de baltar esta llei educativa gobierne quien gobierne.

Les resultancies tán clares y los compromisos previos tamién.

SUATEA y el restu de sindicatos pertenecientes a la confederación de STEs-i sumáronse a la campaña y collaboraron nel so espardimientu y espansión per redes sociales.

Pa nós, dempués de les resultancies de les Elecciones Xenerales, ye necesario repitir la nuesa esixencia de derogar la LOMCE y paralizar la so implantación, asina como los retayos y especialmente del Real Decretu-Llei 14/2012 y les sos aplicaciones territoriales. Derogar la LOMCE ye un compromisu esplícitu adquiríu pola mayoría de los partíos políticos si’l PP nun llograba mayoría absoluta.

Les resultancies tán clares y los compromisos previos tamién. Por eso, una de les xeres más importantes del nuevu parlamentu que va constituyise en xineru va ser la d’encetar con calter inmediatu la paralización de la Llei y la so derogación.

Tienen de ser encetaes dende un nuevu prisma cuestiones tan importantes como la vuelta tras de los retayos qu’afecten a la escuela pública, la supresión de les normes qu’aumentaron la carga horaria del profesoráu, el númberu d’alumnáu nes aules y qu’amenorgaron la inversión n’educación pública y, por supuestu, el futuru agora inciertu de miles de docentes interinos.

Por esto, tanto nel ámbitu estatal como nel autonómicu, hai qu’adoptar midíes urxentes que contribuyan a evitar los efectos destructores de la LOMCE y los retayos. Ye imprescindible esaniciar les reválides, mecanismu perversu contra l’alumnáu. Tamién hai que paralizar con calter inmediatu la obligatoriedá de realizar les nueves programaciones tanto en Primaria como en Secundaria, y establecer una moratoria pa la realización de les evaluaciones al alumnáu, de manera que s’aplique la normativa anterior a la entrada a valir de la LOMCE.

Ye un compromisu que les fuerces polítiques, que güei son mayoritaries dempués de les elecciones, adquirieron cola ciudadanía. Na axenda política, esti tien de ser unu de los primeros asuntos a encetar, yá que, de nun faelo, el perxuiciu pa millones d’alumnes y alumnos y pal profesoráu va ser inmensu.

Esta entrada tamién se puede consultar en: Castellanu