SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
Mientres s’anuncia con gaita y tambor que’l Segundu Plan d’Evaluación de la Función Docente acaba cola discriminación salarial del profesoráu asturianu, la realidá ye otra:
Discrimina al personal docente que nun cumple los criterios d’antigüedá esixíos, talmente que van cobrar menos que’l restu por faer el mesmu trabayu. Nun tenemos d’escaecer que los ítems d’evaluación son intrínsecos a la función docente, tanto si soscribes el Plan d’evaluación, como si non. Poro: mesmu trabayu, distintu salariu.
Discrimina a l@s maestr@s , en cuantes que la retribución mensual del Tramu B establecida pal cuerpu de Secundaria ye muncho mayor que l’asignada al mesmu tramu de Primaria. Esto ye, les maestres (más del 80% son muyeres) van cobrar 162 € mensuales menos que’l profesoráu de Secundaria. Esto nun tien nada que ver colos cuerpos o categoríes, nin colos niveles salariales, ye un inventu autonómicu únicu na so especie, que nun esiste en nenguna otra comunidá. Entós, puestos a inventar un complementu retributivu amestáu a la productividá” ¿por qué nun escurrir el mesmu pa tol mundu? ¿qué ye, qu’en Primaria produzse” menos magar de tener más hores llectives?
La discriminación en cifres:
La diferencia salarial entre una maestra que nun cumple les condiciones pa incluyise nel Tramu A y otra pa entrar nel tramu B, va ser de 288 € mensuales.
En secundaria la diferencia ente una profesora que nun cobre’l tramu A y otra que cobre’l Tramu B va ser de 450 € mensuales.
La diferencia ente una maestra ensin el Tramu A y una profesora de Secundaria col Tramu B ye de 450 € mensuales, a lo qu’hai que sumar la fienda salarial presistente ente dambos cuerpos d’unos 300€, lo que da una diferencia mínima de 750€.
Nun centru educativu “x” tol profesoráu va tener les mesmes condiciones d’horariu, xornada, permisos, vacaciones y va cumplir les funciones docentes que-y son propies, pero nun va haber dos persones que cobren lo mesmo -antigüedá y cargos directivos aparte-. Esta situación tien un nome: segregación.
Frente a la segregación y al “estrema y vas vencer” SUATEA propón la homologación salarial: un complementu autonómicu -esti sí esiste nes demás comunidaes autónomes- igual pa tolos cuerpos qu’oldee les retribuciones de tol personal docente dende’l primer contratu.
El Secretariáu de SUATEA
Uviéu, marzu de 2022
Esta entrada está disponible en: Castellano (Castellanu)
