Home > Centros educativos > Les reválides: Rajoy pretende engañar una vegada más.

Les reválides: Rajoy pretende engañar una vegada más.

LES REVÁLIDES NEL DEBATE D’INVESTIDURA: Rajoy pretende engañar una vegada más.

Les declaraciones del Presidente del Gobiernu nel debate d´investidura sobre l’aplicación de la LOMCE, y concretamente les sos reválides, son una burlla macabra tres les movilizaciones multitudinaries qu’ayer paralizaron la enseñanza pública nel nuesu país.

Les declaraciones realizaes en see parlamentaria pretenden engañar a la comunidá educativa y sirvir de coartada pa que la so previsible investidura nun sía considerada como una traición en toa riegla a los compromisos suscritos por tolos partíos salvo’l PP.

Recordemos que tolos partíos comprometiéronse a derogar la LOMCE. Lo qu’agora propón Rajoy ye caltener la situación actual: yá taba previsto nel calendariu d’implantación de la LOMCE qu’esti cursu la reválida de 4º d’ESO nun tendría efectos académicos. Al respective de la de 2º de bachilleratu, la PAU  yá nun existe, foi sustituyida pola reválida pero desconozse cómo se va a entamar.

Mientres, el profesoráu y alumnáu que cursen estos niveles tán sumíos na desesperación pos desconocen a qué van tener qu’enfrentase’l próximu mes de xunu. Les clases en bachilleratu conclúin en mayu, pero pocu paez importar esto al candidatu y previsible nuevu presidente del gobiernu.

Nel so discursu, Rajoy negóse a derogar la LOMCE y anunció la puesta en marcha – mientres ésta sigue en vigor- d’una comisión pa establecer un pactu pola educación, na que la base sería la mesma llei.

Les reválides van poder ser usaes como moneda de cambéu nuna transacción que pretende caltener el calter segregador, xerarquizante y antidemocráticu de la llei. La privatización del sistema educativu, tresnáu col retayu de miles de millones esixíos pola Comisión europea abre un negru panorama pa la enseñanza pública.

Quienes se faigan cómplices d’estes polítiques tendrán de responder ante la comunidá educativa de la enseñanza pública. SUATEA, xunto cola comunidá educativa, va siguir reivindicando como única alternativa la derogación completa y total de la llei educativa más nefasta de la hestoria.

Uviéu, 27 d’ochobre de 2016

Esta entrada tamién se puede consultar en: Castellanu