Home > Comunicaos > Les migayes del señor Conseyeru Educación

Les migayes del señor Conseyeru Educación

LES MIGAYES DEL SEÑOR CONSEYERU EDUCACIÓN

Nel Plenu de la Xunta Xeneral celebráu güei, énte una entruga de la diputada d’IX Concha Masa sobro’l profesoráu asturianu, el Conseyeru d’Educación anuncia l’amenorgamientu d’una hora complementaria nel horariu selmanal de permanencia nel centru de los y les docentes de Secundaria y Formación Profesional.

Esta midida por sí sola nun resuelve los graves problemes de sobrecarga de trabayu, pal profesoráu y los equipos directivos qu’esiste nos centros educativos si nun vien acompañada, per una parte, del amenorgamientu d’horariu lectivu y per otra, d’un plan pa dotar les plantiyes docentes de profesoráu y personal d’alministración de servicios.

Nestos momentos, nos centros educativos multiplicáronse les xeres burocrátiques y de xestión. Esto coincidió nel tiempu col mayor retayu de personal de la hestoria del sistema educativu asturianu. Amás Asturies y Castiella la Mancha son les comunidaes con más retayos n’educación ente 2008 y 2015, según datos del Ministeriu d’Educación afechos a la inflación. En 2008 empezaron los retayos, sobremanera en materia de personal, cola perda de más de 600 docentes y la xeneralización de los puestos a media xornada, que suponen yá un 10% del total. Asturies, gobernada dende 2008 pol PSOE, sacante un añu, ye la segunda de la llista de comunidaes que más retayaron, con 276 millones menos en gastu educativu.

Foi precisamente en 2012, col decretu Wert, cuando s’apinó’l deterioru de les condiciones llaborales del profesoráu y l’aumentu, tanto del horariu lectivu como nel non lectivu. L’aplicación d’esi decretu realizada de la peor manera pues al contrariu d’otres CCAA, la Conseyería d’Ana González amontó en dos periodos lectivos y dos complementarios los horarios docentes en Secundaria. Tamién nesi añu empezaron a incumplise sistemáticamente los alcuerdos de plantiyes en Primaria lo que traxo un empeoramientu xeneralizáu de l’atención a la diversidá, la obligación pal profesoráu especialista d’asumir tutoríes, la desapaición de sofitos n’Infantil, etc.

La reivindicación unánime del profesoráu ye la de recuperar les condiciones llaborales previes a esi retayu, que foi calteníu y agraváu pola actual Conseyería d’Educación. Si a esto añedimos que la implantación de la LOMCE se fixo a base de forzar a los claustros a ellaborar nueves programaciones, a realizar evaluaciones y reválides, a rellenar encuesta tres encuesta ensin utilidá dalguna, el resultáu pa los centros ye demoledor.

Los agravios comparativos con comunidaes como la vecina Cantabria, les Isles Baleares o Andalucía aumenten el descontentu ente’l profesoráu asturianu, que yá se manifestó por aciu pidimientos a la Conseyería, recoyida de firmes o movilizaciones de la Xunta de Personal Docente. En Cantabria por casu, el próximu cursu, el profesoráu de secundaria va volver al horariu anterior al decretu Wert, lo que supón un amenorgamientu de dos hores d’horariu lectivu.

N’Asturies lo que la Conseyería pretende ye realizar una operación de maquillaxe a costu cero: esto ye, amenórguense nuna hora la permanencia nel centru pero esto nun s’acompaña d’un plan de dotación de personal abondo pa realizar les xeres complementaries qu’esisten.

La Conseyería vese obligada a mover ficha, tres les movilizaciones del profesoráu y el fartura del mesmu. Pero pretende faer recayer nes direcciones de los centros la organización de los centros col mesmu númberu de xeres y menos hores pa desenvolveles.

Secretariáu de SUATEA

Uviéu 23 xunu de 2017

Esta entrada tamién se puede consultar en: Castellanu