Home > Aición sindical > Les enmiendes aceptaes pol PP empioren tovía más el testu de la LOMCE

Les enmiendes aceptaes pol PP empioren tovía más el testu de la LOMCE

Fuelga 24 ochobre 2013Desapaez el conceptu de serviciu públicu d’educación.

Lo que va suponer la privatización y desregulación dafechu del sistema educativu, que dexa de ser una obligación de los poderes públicos.

Desapaez el derechu a un concursu de tresllaos oxetivu.

Declárase al profesoráu autoridá pública y a un tiempu quítase-y el derechu a un concursu de tresllaos oxetivu y ponse un sistema d’accesu o permanencia nel puestu de trabayu basáu nel enchufismu, l’amiguismu y l’arbitrariedá.

Los docentes de centros privaos alquieren los mesmos derechos que los funcionarios.

Les pruebes de reválida podrán corrixiles docentes de centros privaos: la contratación nun centru priváu apurre los mesmos derechos que tener superao un procesu públicu d’accesu a la función docente. Esos derechos niéguense-y al profesoráu interín.

Imposición d’inmersión llingüística en llingües estranxeres.

Les alministraciones educatives van poder afitar sistemes pa impartir toles materies non llingüístiques nuna llingua estranxera. Con ello podría dase la obligatoriedá pa tolos docentes d’eses materies d’impartiles nesa llingua . Ye’l casu de les Isles Baleares col intentu de poner el trillingüismu y la obligación del profesoráu d’impartir les materies n’inglés.

Cesión de suelu públicu a centros privaos.

Les alministraciones deberán ceder suelu públicu pa que les empreses privaes llevanten centros educativos. Recordemos que sólo nel cursu 2011-12 los beneficios de la privada concertada llegaron a 550 millones d’euros sigún l’informe del Conseyu Escolar del Estáu.

Incertidume nel futuru de la llingua asturiana.

Anecia na centralización del curriculum y dexa les llingües vernácules nun segundu planu. La situación y el futuru de la llingua asturiana siguen llenos d’incertidumes.

 

PDF: Les enmiendes aceptaes pol PP empioren tovía más el testu de la LOMCE

SCRIBD: Les enmiendes aceptaes pol PP empioren tovía más el testu de la LOMCE

Esta entrada tamién se puede consultar en: Castellanu