Home > Comunicaos > Les declaraciones de Méndez de Vigo, un ataque contra la escuela pública y el so profesoráu.

Les declaraciones de Méndez de Vigo, un ataque contra la escuela pública y el so profesoráu.

vigo+El ministru d’Educación, Méndez de Vigo, acaba de revelar cuálos son les sos intenciones respecto al profesoráu de la enseñanza pública del nuestru país. Llamentablemente, la llínia que sigue ye la del so predecesor. A pesar d’intentar dar imaxe de dialogante, qu’ameyorara la nefasta xestión del ministru anterior artífiz de la LOMCE, lo qu’amuesa claramente ye’l so siguidismu al afondar na privatización de la educación y poner al profesoráu nuna situación d’absoluta indefensión.

Tres empeorar hasta llendes insostenibles les condiciones llaborales del profesoráu, amenorgaos los sos salarios, aumentaes les hores de trabayu, el númberu de grupos y d’alumnáu qu’atender; acabao cola atención a la diversidá y amenorgao les posibilidaes de sacar alantre a munches alumnes y alumnos; tres degradar la situación del sistema públicu d’enseñanza col amenorgamientu del PIB destináu a educación col despidu de miles de docentes y consiguir facer recular los indicadores relativos al progresu del país en sanidá y educación… el gobiernu de Rajoy col so nuevu ministru Méndez de Vigo presenten como novedosa una política en materia de profesoráu que yá probó los sos efectos en países como Chile o los mesmos Estaos Xuníos.

Trátase de que’l profesoráu sía retribuíu en función de la evaluación de los resultaos del alumnáu y del centru educativu nel que desempeña’l so llabor. La escusa ye que nun se pue pagar lo mesmo a quien llogra peores notes nel so trabayu. L’aplicación d’esta teoría del más ranciu estilu neolliberal que los siguidores de la escuela de Chicago llevaron al Chile de Pinochet amosó yá claramente les sos consecuencies: degradación del oficiu docente, arbitrariedá na atribución de fondos a les escueles y al so profesoráu, privatización creciente del sistema educativu… Y nel casu de los Estaos Xuníos, onde en dellos estaos implementáronse midíes d’esti calibre, les consecuencies d’estes polítiques supunxeron el pieslle de numberosos establecimientos escolares, el despidu de miles de docentes y l’entrega de diches escueles a la iniciativa privada.

La LOMCE yá contien nel so xerme midíes asemeyaes a les propuestes por Méndez de Vigo siguiendo al so filósofu de cabecera, el señor Marina. Pero entá nun s’atrevieren a espresales d’esta manera. El profesoráu ta indignáu: en cuenta d’adoptar midíes pa favorecer el trabayu n’equipu, recuperar el poder adquisitivu perdíu, amenorgar la carga llaboral de los docentes y fomentar l’atención a la diversidá cola dotación de personal a los centros educativos, en cuenta de garantizar la estabilidá de les plantiyes docentes col accesu a la función pública del profesoráu interín, atopamos con una propuesta pa dinamitar la enseñanza pública y achacar al profesoráu los males que deriven d’una política nefasta en materia d’educación.

Dende SUATEA llevemos sollertando al profesoráu de qu’esti tipu de polítiques lo que pretenden ye individualizar les relaciones llaborales, convertir a les direcciones de los centros en simples xestores con poder pa escoyer o refugar profesoráu, en definitiva pa faer d’una xera colectiva como tien de ser la educación pública nuna actividá mercantilista.

SUATEA refuga de planu esti intentu de xerarquizar al profesoráu y esixe a los partíos políticos que se pronuncien inequívocamente contra una política del que so fin últimu ye degradar a la enseñanza pública y favorecer la so privatización.

La homologación retributiva pa tol profesoráu ye una asignatura pendiente. De fechu, l’Alministración educativa asturiana, en manes del PSOE, imponiendo criterios alloñaos a la equiparación salarial que dende SUATEA reivindicamos como principiu, actuó d’avanzadura nel contestu estatal ya impunxo la desigualdá, instaurando un sistema retributivu basáu na discriminación salarial.

Esta entrada tamién se puede consultar en: Castellanu