Home > Comunicaos > Les axudicaciones d’interinos nun cubren les necesidaes

Les axudicaciones d’interinos nun cubren les necesidaes

Énte la publicación de l’axudicación de vacantes al profesoráu interín, feches públiques nel día de güei pola Conseyería d’Educación, SUATEA quier poner en conocencia de la opinión pública lo siguiente:

1. Que yá denunciemos nel so momentu, antes de rematar el cursu pasáu, que les vacantes concedíes a los centros yeren absolutamente insuficientes p’atender les demandes del profesoráu de los mesmos y pa poder entamar el cursu 2017/18 con plantiyes abondo amplies pa poder ufiertar una educación de calidá, al altor de les necesidaes.

2. Que n’axudicación de vacantes feches públiques güei, hai decenes d’elles que nun fueron axudicaes, polo que de nun iguase urxentemente’l problema, verémosmos obligaos, otra vuelta, a un empiezu de cursu en que parte del alumnáu nun va cuntar con tol profesoráu necesariu.

3. Que la non axudicación de les vacantes repercute bien negativamente nel profesoráu interín yá que, casu de que vuelvan convocase, nun van poder ser axudicaes a les persones interesaes nes mesmes a les que se-yos otorgaren otres vacantes.

4. Que, una vegada más, l’alministración educativa fai de menos y marxina a les organizaciones sindicales y a les y los lexítimos representantes del profesoráu que son sistemáticamente escluyíes d’estos procesos. Non yá se fráya’l derechu a representación sindical, sinón que se torga que les organizaciones sindicales collaboremos, tamién, na detección d’errores; collaboración que siempres ufiertamos cuando se nos escucha.

5. A lo último, encamentamos al Sr. Conseyeru d’Educación, Genaro Alonso, a que convoque a les organizaciones sindicales, con calter urxente, pa estudiar la forma de desaniciar los problemes a los que, d’otra manera, van vese irremisiblemente empuestos los centros énte l’inminente empiezu de cursu y n’ares d’ufiertar una educación pública de la mayor calidá posible.

El Secretariáu de SUATEA

N’Uviéu, a 23 d’agostu de 2017

Esta entrada tamién se puede consultar en: Castellanu