L’axudicación de places al profesoráu interín: IMPÓNSE LA PRECARIEDÁ

Na mañana de güei realizóse la primer axudicación de vacantes al profesoráu interín. Fueron un total  de 3093 places, distribuyíes como sigue:

Secundaria: 996; Cuerpu de Maestros: 1803; Formación profesional: 160; Escueles Oficiales d’Idiomes: 21; Música y Artes escéniques: 76; otros Cuerpos: 37.

Consideramos inaceptable l’eleváu númberu de places a media xornada, que suponen que’l profesoráu interín trabaye nunes condiciones cada vez más precaries. En Secundaria, el 41% de les vacantes son a media xornada; nel Cuerpu de Maestros, el 30.6%; en Formación Profesional, el 17%. Por especialidaes, destaquen el 62.5% de places a media xornada en Filosofía, el 50% n’Inglés y el 88% n’Asturianu de Secundaria; el 49% n’Audición y Llinguaxe.

Como en cursos anteriores, cónstanos que nun s’ufierten toles vacantes esistentes y que van salir nuna segunda convocatoria que se va realizar el 17 de setiembre. Esta falta va afectar ensin dulda al funcionamientu de los centros, que tendrán de empezar el cursu coles plantiyes incompletes, alumnáu ensin el profesoráu que-y correspuende, guardies que recaen sobro’l proefesoráu y, en determinaos casos, ensin  la presencia nel entamu del cursu del tutor o tutora del grupu al que tán asignaos. Nun sabemos bien si tien el so orixe en criterios d’aforru económico inducíu pola política de retayos o a falta de planificación per parte de l’Alministración.

Esta política de nun ufiertar toles vacantes na primer convocatoria tamién afecta al profesoráu interín, pos nun puen optar a toles places esistentes y, en dellos casos, tienen qu’escoyer places contraries a los sos intereses (medies xornaes, puestos alloñaos, etc.), lo que trai desaxustes ya inxusticies nel orde de prelación de los aspirantes.

Per otra parte, tenemos de tener en cuenta que nesta convocatoria falten más de 700 vacantes que se correspuenden col trabayu extra pal profesoráu que se xeneró cola sida de la crisis económica en 2012. La reivindicación de les 18/23 hores lectives pal profesoráu de Secundaria y Primaria respectivamente ye un clamor unánime ente docentes y que reclamamos de forma insistente toles Organizaciones Sindicales. Estos años la Conseyería xustificose en sides llegales pa imponer l’aplicación del Decretu qu’imponía eses hores estraordinaries. Anque’l nuevu gobiernu anunció la so voluntá d’esaniciales, la Conseyería d’Educación fixo oyíos sordos y sigue aplicando esos recortes.

Esto supondría un importante aliviu pa tol profesoráu interín afectáu pola postrera OPE, pos la última convocatoria d’oposiciones y l’alcuerdu d’interinidá vixente, qu’obliga a rebarenar les llistes tres los procesos selectivos, provocaron que munches persones quedaren ensin trabayu. Dende SUATEA, vamos siguir esixendo la negociación d’un nuevu alcuerdu d’interinidá menos lesivu pal colectivu interín y más acordies col restu de CCAA.

Uviéu, 31 d’agostu de 2018

SECRETARIÁU DE SUATEA