L’aumentu de contaxos nos centros educativos vuelve a poner en riesgu la salú de la comunidá escolar

Esta entrada está disponible en: Castellano (Castellanu)

L’impactu de l’andancia sigue marcando l’actividá nos centros educativos asturianos. Reconociólo asina ayer la Conseyera d’Educación Lydia Espina nuna comparecencia na Xunta Xeneral, señalando que los datos de l’andancia vuelven a ser esmolecedores y asusten a los responsables educativos.  Dende SUATEA queremos siñalar que mos atopamos nuna situación qu’obliga al profesorado a facer un esfuerzu extra pa rebaxar les deficiencies que tán por iguar poles alministraciones educatives. Ún d’estos déficits, posiblemente’l que más trastornos xenera a profesoráu y alumnáu ye’l sistema de sustituciones del personal docente, que nun garantiza la rapidez en cubrir les baxes. Un problema de xestión que vien de cuantayá na alministración educativa asturiana.

No que toca a les midíes de prevención pa esti cursu escolar, SUATEA yá manifestó’l so refugu, y asina-y lo comunicó a la propia consejera na entrevista fecha en setiembre, énte la decisión de volver a les ratios d’alumnáu por aula qu’había primero de l’andancia. Siñalamos que mientres se mantenga l’alerta sanitaria, una  política de  precaución y  prevención pasa  per  mantener  les  condiciones pa torgar la masificación del alumnado que se da en determinaos niveles educativos y/o en determinaos centros. Nun tien xacíu mantener les entraes y salíes escalonaes y, a un tiempu, xuntar a más de trenta alumnos y alumnes nes aules de Bachilleratu.

Agora, la suba de contaxos ente’l profesoráu y l’alumnáu y de les midíes darréu deconfinamientu d’estes selmanes, faen rescamplar que les autoridaes educatives garraron decisiones onde na so base  argumental pesaron  más  los  motivos presupuestarios que los sanitarios, al prescindir de los ruinos refuerzos de plantiya cola que se dotó a los centros l’otru cursu; como si’l sistema yá tuviese preparáu pa encarar nueves foles, o como si naide les esperase.

Sicasí, con fecha 30 de payares, la propia Conseyería informaba qu’había 78 aules y 1560 estudiantes confinaos, lo que suponía nesi momentu’l 1.16% d’unidaes y el 1.13% d’alumnáu. Estes cifres medraron d’entós p’acá y les perspectives nun inviten a pensar que la tendencia vaiga a tornase nes próximes selmanes.

Coincidiendo tolos axentes educativos na importancia del enseñu presencial, paez una visión mui ruina nun poner a disposición los medios amañosos p’afitar esa presencialidá hasta unes llendes razonables y esto pasa pela contratación de más profesores y de la figura de personal d’enfermería escolar con carácter estructural que permita encarar con más solvencia esti tipu de situaciones coyunturales y tantes otres incidencies de tipu sanitariu que pasen nos centros.

Dende SUATEA aneciamos en que la Conseyería ha de mirar pol cumplimientu de los sos propios protocolos nos centros educativos: provisión de mázcaros, medidores de CO2, etc. pero tamién queremos denunciar el papel del Ministeriu d’Educación, incapaz de poner protocolos comunes, pesie a les munches reuniones que se tuvieron nel ámbitu de la Conferencia Sectorial d’Educación. Un Ministeriu que paez responder fundamentalmente a criterios políticos y que, en consecuencia, arrequexa les midíes que dende un puntu de vista educativu y sanitariu teníen que ser prioritaries. La Sra. Pilar Alegría ha d’entender que la so obligación fundamental ye cola comunidá educativa, non con Pedro Sánchez nin colos responsables políticos de les Conseyeríes y Departamentos d’Educación de les Comunidaes Autónomes.

El Secretariáu SUATEA
Uviéu, 14 d’avientu de 2021

Print Friendly, PDF & Email

Esta entrada está disponible en: Castellano (Castellanu)

La organización de muyeres de la CI esixe que la LOMLOE tenga presente a les muyeres de fechu, y non solo na teoría

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757