L’alministración asturiana sigue maltratando a los opositores

Esta entrada está disponible en: Castellano (Castellanu)

Los criterios afitaos pa la ufierta pública d’empléu docente nun garanticen nin la equidá nin la oxetividá, y siguen maltratando al profesoráu asturianu.

Güei vienres 13 de marzu aconceyaron les organizaciones sindicales presentes na Xunta de Personal cola Conseyería d’Educación pa falar de los criterios a siguir nel concursu-oposición d’esti añu. Previamente, la Conseyería pidiera a les OO.SS. que fexeren les aportaciones que vieren oportunes sobre cómo debería desendolcase esi procesu. Tenemos que dicir que’l resultáu nun puede ser más decepcionante, yá que de les propuestes sindicales nun s’almitió casi nenguna y los criterios que van rixir siguen ensin garantizar la equidá y la oxetividá que deberíen ser la clave de tol procesu.

Y esto ye asina porque l’Alministración decidió, ente otres coses, que:

  • Siga habiendo un sortéu de tema por cada tribunal, que, xunta l’asignación de places por tribunal, fai qu’en cuenta d’un concursu-oposición, igualitariu pa toles persones que se presenten n’Asturies, va haber tantos como tribunales s’asignen.
  • Nun van facese públicos los criterios de calificación de los tribunales anantes de la primer prueba, polo que los opositores van dir a ciegues. De fechu, nin siquiera ta garantizao que lleguen a facese públicos dacuando.
  • Nun se garantiza l’anonimatu del aspirante, al tener que lleer la so prueba delantre’l tribunal, siendo Asturies prácticamente la única comunidá autónoma que sigue con esi criteriu arcaicu.
  • Nun va permitíse-y al opositor que, cuando defenda la unidá didáctica énte’l tribunal, puea recurrir a medios on-line al tar prohibida la conexón a la Rede mientres dure la prueba, llendando asina la posibilidá d’apurrir recursos dixitales.
  • Nun van valorase los graos nel apartáu II (Formación académica). El títulu de grau val namás pa presentase a la oposición. Nel apartáu 2.3. namás van cuntar les diplomatures y les llicenciatures.
  • Va siguir ensin cuntar absolutamente nada la conocencia de la llingua asturiana nin los títulos propios de la Universidá d’Uviéu.
  • Va siguir ensin haber una prueba adicional de conocimientu de la realidá asturiana.

Bien ye verdá que s’elimina la posibilidá de qu’hebia miembros voluntarios de los tribunales, y que s’almite que la entrega de les programaciones pa depués de la primer prueba, pero en tou casu dende SUATEA paécennos concesiones claramente insuficientes si les comparamos con toles demás negatives a propuestes que taben na so mayoría compartíes por toles organizaciones sindicales.

Otres informaciones d’interés pa los opositores son:

  • La parte práctica de la primer prueba (parte A) va consistir nun supuestu prácticu sobre’l que van facese preguntes.
  • Tanto’l desenrollu del tema escritu como de la parte práctica van ser lleíes pol opositor énte’l tribunal.
  • Va ser el tribunal nº 1 de cada especialidá el qu’asuma les funciones de coordinación y afite los criterios que correspuenden a un comité de selección: ellaboración de la prueba práctica y de los criterios de calificación, y igua de duldes.
  • Les programaciones han facese siguiendo’l currículu LOMCE menos n’Infantil que tovía nun se modificó. Han constar de 30 páxines (ensin cuntar portada nin contraportada) en DIN A4 a una cara con lletra Arial 11 ensin comprimir.
  • Les unidaes didáctiques han ser un mínimu de 10. La persona opositora elixirá unu ente tres peñeraos al azar de la propia programación o del conteníu de los temarios. Han de tener como mínimo estos apartaos: Oxetivos, conteníos, actividaes d’enseñu-aprendimientu, procedimientos d’evaluación y midíes d’atención al alumnáu con NEE.
  • Va haber una hora pa la preparación de la unidá didáctica qu’elixa l’opositor depués del sortéu, pudiendo utilizar tol material auxiliar que vea amañosu pero ensin nenguna conexón col esterior, incluyendo la Rede.
  • La defensa de la programación y la unidá didáctica fadránse nuna hora (la Conseyería nun determinó’l tiempu de cada prueba, solo fixó’l tiempu máximu pa la suma de les dos), pudiendo depués el tribunal facer les entrugues que vea oportunes.
  • Programaciones de las especialidades de PT y AL: puede ser un Plan de Apoyo Anual o un Plan de Trabajo Individual para el curso escolar referido a un supuesto que proponga el/la opositor.
  • En casu de nun llegar al 1’25 en caúna de les dos partes de la primer prueba, nun apaecerá la calificación nes actes.
  • L’asignación de places por tribunal va ser proporcional al númberu d’aspirantes que fagan la primer prueba completa.

Ta previsto que la convocatoria salga esti martes 17 nel BOPA.

N’Uviéu, a 13 de marzu del 2015

Print Friendly, PDF & Email

Esta entrada está disponible en: Castellano (Castellanu)