Home > Comunicaos > L’adxudicación del profesoráu interín: un nuevu retayu

L’adxudicación del profesoráu interín: un nuevu retayu

1/2 xornada + 1/2 xornada nun son 2 xornaes

1/2 xornada + 1/2 xornada nun son 2 xornaes

Esti vienres va salir l’axudicación de places vacantes de profesoráu interín. Otra vuelta la Conseyería d’Educación enfótase en nun atender toles necesidaes que reclamen los centros.

La non dotación d’eses places va implicar qu’énte ausencies sobreveníes de profesoráu nun va haber personal llibre p’atender como correspón al alumnáu. L’axustada dotación va suponer, amás, que los departamentos didácticos nun van poder afayar midíes d’atención a la diversidá como sofitos o desdobles, pesie a que nun se revocó la xuba a 20 hores llectives al profesoráu.

Por si fora poco, prevemos que van axudicase menos places que les primeramente ufiertaes, como asocedió nos cursos anteriores. L’amenorgamientu veráse acentuáu nun futuru próximu coles fusiones de centros y cambéu na naturaleza de los mesmos mazcarada de cambéu de nome; un exemplu d’ello tenémoslu na Escuela de Valdellera en Posada de Llanes qu’esti cursu va dexar d’impartir enseñanza Secundaria pa impartir namás Primaria si lo aprueba’l Conseyu Escolar del Principáu d’Asturies.

Mientres el Gobiernu Central ataca’l derechu a la educación col decretu de beques, el nuesu gobiernu autonómicu esmantela la educación pública amenorgando les places de profesoráu. A la vista d’esta situación SUATEA caltién que la movilización ye necesaria y namás per aciu d’ella pué consiguise que l’Alministración modifique la so postura.

Por ello convocamos al profesoráu a una concentración que va faceser el vienres 30 d’agostu a les 12 hores na Plaza d’España d’Uviéu, énte la Conseyería d’Educación.

Esta entrada tamién se puede consultar en: Castellanu