Home > Muyer > La xusticia patriarcal o “los homes que nun amaben a les muyeres”

La xusticia patriarcal o “los homes que nun amaben a les muyeres”

La Organización de Muyeres de la Confederación Intersindical quier amosar el so refugu más contundente a la sentencia pol casu de la violación múltiple cometida por cinco homes contra una moza nos Sanfermines del 2016.

Toles feministes tábemos pendientes de la llectura de la sentencia d’ayeri 26 d’abril (aciar día pa la llucha feminista), con una parte d’esperanza pero tamién con medrana a que se cumplieren los más aciagos presaxos. Ante la llectura de la sentencia, les muyeres sentímonos talamente abandonaes pola xusticia nesti país. La tristura inicial con munches llárimes, porque sí, les muyeres cuando mos emocionamos (pa bien o pa mal) solemos exteriorizar esos sentimientos, foi sustituyida pola ira más fonda contra una sentencia tan suave por unos fechos tan terribles.

La víctima, otra vez, ye esforciada por una xusticia patriarcal que considera que  cinco homes forníos, que fuercen a entrar nun portal a una moza a la qu’obliguen ¿ensin violencia? a realizar tou tipu d’actos sexuales, nun ye violación, sinón abusu. Lo que yá ye escesivo ye’l votu particular d’ún de los xueces qu’argumenta que nun-y vio cara de sentir dolor, congoxa,… nótase que ye home y que nunca sintió la medrana de vese arrodiáu de cinco persones muncho más fuertes qu’él y que, si nun fai lo que-y dicen, puean fae-y más dañu tovía. Porque esi ye’l problema de la xusticia nesti país, que les persones encargaes d’enxuiciar los delitos de violencia contra les muyeres nun tienen la formación necesaria pa tratar estos casos. P’afirmar que nun hai violencia nin intimidación, el fallu esplícanos el tipu de violencia que tendría d’haber: la que causa mancadures graves o la que se da tres la resistencia activa d’una muyer. Y esto ye daqué absolutamente obsoleto. Naciones Xuníes lleva años defendiendo que la violencia nun ye eso, sinón que ye esforciar la voluntá.

Nun somos xuristes, nin queremos caciplar nel poder xudicial, pero si esta sentencia ta basada nun códigu penal, igual tenemos de planteganos el cambéu d’esti códigu y facelo amás con perspectiva feminista pa que nun vuelva asoceder lo que pasó con esti xuiciu, y con otros non tan mediáticos pero cola mesma resultancia. Les feministes tamos  sollertes y ayeri demostremos una vegada más que tamos fartuques de que se mos faiga culpables de la violencia que sufrimos y de que la xusticia patriarcal siga perpetuando la cultura de la violación como daqué normalizao dientro d’una sociedá onde les muyeres tamos cosificaes. Perdimos una batalla pero non la guerra y nun vamos descansar hasta que nesti país y nel mundu les muyeres dexemos de ser consideraes de segunda categoría, se mos respete y valore como persones con tolos derechos.

Dende la Organización de Muyeres de la Confederación Intersindical, queremos amosar tol nuesu sofitu a la víctima. Tamos contigo y vamos siguir na llucha hasta que llogremos que la Xusticia nesti país sía equitativa y xusta de verdá.

Esiximos una revisión del códigu penal por que nun vuelvan producir se sentencies como esta.

27 d’abril de 2018

Organización de Muyeres CI.

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743