La Xunta de Personal Docente convoca movilizaciones

La Conseyería d’Educación y Cultura amuésase inoperante al respective de les esixencies sindicales relatives a la reversión de los retayos qu’afecten a les condiciones llaborales del profesoráu y a la so xornada llaboral.

El RD 14/2012 de midíes urxentes de racionalización del gastu público introdució nel ámbitu educativu los mayores retayos de les últimes décades. Ente les midíes enllantaes atópase medría de les hores lectives en Secundaria, Formación Profesional y Enseñances Artístiques ya Idiomes. Y a esto añedir que l’Alministración asturiana impunxo a esti profesoráu la mayor carga d’hores complementaries de tol Estáu. La medría de la carga horaria ye unu de los factores que más inflúi nel deterioru de la calidá educativa, pues xenera un perxuiciu a les plantiyes, a los puestos de trabayu y al propiu clima de convivencia nos centros.

Per otra parte, nel casu d’Educación Infantil y Primaria, esi retayu traducióse nel incumplimientu sistemáticu per parte de l’Alministración educativa asturiana de los Alcuerdos de Plantiyes soscritos colos sindicatos, lo que supón que les xeres se multipliquen, que nun haya un tutor de la especialidá de Primaria per cada unidá de Primaria, que s’obligue al profesoráu especialista a compatibilizar les sos xeres col desempeñu de la tutoría, que se suprimieren sofitos cola siguiente falta d’atención a la diversidá, etc.

Dende esta Xunta Personal Docente, venimos reclamando va munchu tiempu l’apertura de negociaciones que dexen la recuperación de la xornada lectiva que teníen los y les docentes antes del RD14/2012. Nun ye de recibu que l’Alministración asturiana aplique los retayos de manera inmediata y nun adopte cola mesma priesa  la recuperación de los derechos perdíos. Si queremos una educación pública asturiana de calidá, ye necesario avanzar n’alcuerdos que nos dexen mermar les consecuencies de los retayos, tal como fixeron en distintes comunidaes autónomes, como Cantabria,  Andalucía, Isles Baleares y Cataluña, ente otres, qu’alcordaron coles organizaciones sindicales la recuperación d’esta xornada lectiva.

Poro, les organizaciones sindicales qu’integren la Xunta de Personal Docente, col fin d’esixir l’apertura de negociaciones que nos dexen alcordar un plan pa llevar a cabu l’amenorgamientu horariu en toles etapes educatives y recuperar los derechos perdíos, convoquen al profesoráu asturianu a participar na CONCENTRACIÓN, que va tener llugar el próximu xueves 18 de mayu, a les 18 hores, na Plaza España d’Uviéu.