La vuelta a la normalidá nun va ser inmediata

Esta entrada está disponible en: Castellano (Castellanu)

La decisión oficial d’esaniciar l’usu de los mázcaros n’espacios zarraos anunciárase hai unes selmanes antes y, ayeri, el Conseyu de Ministros oficializóla. Trátase pues d’una noticia anunciada de mano. Non por ello pierde interés y trescendencia cuidao que la reconocencia d’una serie d’esceiciones confirma la idea, avanzada por dellos espertos, de que podría ser interesante retardar esta decisión hasta conocer cuál va ser l’impactu de la movilidá vacacional de la Selmana Santa.

Sía que non, el Gobiernu central siempres señaló que les decisiones en materia sanitario adóptenles los espertos en Salú y, nel casu d’Asturies, lo que fai’l  Gobiernu autónomu ye cinxise a les instrucciones que vienen del SESPA. Con estos datos, la Conseyería d’Educación asturiana anunció’l final de la obligatoriedá del so usu nes aules pa tol alumnáu y el profesoráu, señalando coles mesmes qu’esa decisión nun implica nenguna obligatoriedá, refiriéndose asina a los posibles casos de families que puedan decidir que la so reciella siga allegando al centru colos mázcaros o tamién a casos asemeyaos ente’l profesoráu.

L’adopción d’esta decisión hai que saludala dende la perspectiva d’un  procesu de vuelta a la normalidá post-pandémica, pero convién nun engañase, porque l’amenaza del virus va siguir presente na nuesa sociedá. D’equí p’arriba, nos centros va haber persones que sían portadores del virus, na mayoría de los casos ensin síntomes y ensin  nengún tipu de protección, polo que’l riesgu d’andada va ser bien grande. L’apueste de tratar al covid como si fuere un gripe tien los sos riesgos y va haber quien decidan siguir asistiendo a los centros de trabayu col mázcaru. Ente’l profesoráu, quien sían más vulnerables o convivan con persones de riesgu tendrán de siguir utilizando esta midida de protección que sigue siendo la que mayor protección ufierta.

Hasta agora, nos centros esistía una partida económica que dexaba financiar la compra de mázcaros. Queda por saber si la Conseyería va siguir ufiertándoles al profesoráu que les precise y a quien decida siguir usándoles o si, otra manera, a partir d’esti momentu la so compra va suponer un gastu más qu’ayude a arredondiar la inflación en redol al 10% qu’acaroña día ente día’l nuesu poder adquisitivu.

Poro, dende SUATEA caltenemos que la Conseyería d’Educación tien de siguir financiando la compra de mázcaros pal personal que trabaya nos centros educativos conforme a les necesidaes qu’estos planteguen.

Uviéu, 21 d’abril 2022

Print Friendly, PDF & Email

Esta entrada está disponible en: Castellano (Castellanu)


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757