La teoría del caos apoderase de la Conseyería d’Educación

UN NUEVU ALCUERDU D’INTERINOS Y NUEVOS SISTEMES INFORMÁTICOS PODRÍEN DETENELA

 Un añu más los sistemes informáticos que xestionen los procesos d’axudicación de profesoráu fallaron. Los funcionarios en práctiques qu’aprobaron el recién procesu selectivu vieron como se-yos axudicaron les places de forma errónea. Esta mañana dende SUATEA solicitemos al Conseyeru d’Educación una xunta con cuenta d’esclariar a estes persones la situación na que se van atopar a 31 d’Agostu cuando tengan que presentase a roblar el contratu, a metá de mañana fuimos recibíos pol Conseyeru d’Educación y el Director Xeneral de Planificación Docente. La solución que dieron nun dexó conforme a naide, como yá ye habitual indiquen qu’han de presentar en rexistru un espón-solicita nel que s’esplique’l casu y que la Conseyería d’Educación va resolver como estime oportuno. La resultancia d’esta reclamación los docentes afectaos van conocela el mesmu día 31 d’Agostu cuando se presenten a la firma del contratu, momentu nel que van poder ver si siguen mal axudicaos o si s’atendió’l so pidimientu.

Nun podemos escaecer, tal como recuerda’l Director Xeneral, que’l nun roblar el contratu’l 31 d’Agostu de nun iguase l’erru implica l’arrenunciu a la plaza llograda. Estes soluciones a los que yá nos tienen acostumaos los xestores de la Conseyería d’Educación dexen en total indefensión a los alministraos.

A esto hai qu’añedir qu’ayeri publicáronse les llistes provisionales d’interinos, na que cientos de persones tres presentase a les oposiciones y pagar les tases correspondientes al procesu selectivu de toes aquelles llistes nes que yá apaecíen (tal como s’indica nel nefastu Alcuerdu d’interinos -robláu por ANPE, UXT y la mesma Alministración- con enfotu namá recaldatoriu) vense escluyíos de toes elles, de nuevu la única solución apurrida pola Conseyería ye que los perxudicaos presenten un espón-solicita indicando esta situación. Esti profesoráu al nun apaecer na llista nun puede comprobar la so baremación, polo que’l plazu pa la reclamación de dichu baremu pa los mesmos resulta inútil. Van apaecer, con suerte, el día 19 d’agostu nes llistes correspondientes si reclamen, pero con un baremu que yá nun va ser reclamable.

Con tou esto’l Conseyeru d’Educación ye capaz d’apaecer en rueda de prensa normalizando toos estos despropósitos como si l’atropellu que sufren nel entamu de cursu los docentes asturianos cursu tres cursu fora un mal menor, demostrando asina’l despreciu absolutu a un colectivu del que’l tendría de ser el mayor defensor.

Esto solo ye’l preludiu de los que ta por llegar el próximu mes d’Agostu, cuando se publiquen les llistes definitives d’interinos y se faiga el pidimientu d’entamu de cursu, onde miles d’interinos van aportar a realizar los sos pidimientos nun curtiu periodu de tiempu a un sistema informáticu obsoletu, inestable, ineficiente y remanáu por personal ayeno a Educación. Dende SUATEA esiximos una vegada más a la Conseyería d’Educación y la Dirección Xeneral de Tecnoloxíes de la Información y les Comunicaciones dependiente de Conseyería d’Empléu, Industria y Turismu que pongan remediu a esta problemática repitida cursu tres cursu, con cuenta d’evitar una futura cayida de los sistemes informáticos que va poder sumir nun caos absolutu al sistema educativu asturianu per tiempu indetermináu.

Esiximos amás la negociación d’un nuevu alcuerdu d’interinos qu’evite situaciones como la que comentamos enriba na que miles d’interinos dempués de pagar les sos tases vense escluyíos de toles llistes. Un atropellu más consecuencia d’un nefastu alcuerdu d’interinos.

Secretariáu de SUATEA

28 de xunetu de 2016