Home > Comunicaos > La propuesta la Conseyería: insuficiente y ríxida

La propuesta la Conseyería: insuficiente y ríxida

LA PROPUESTA DE LA CONSEYERÍA D’EDUCACIÓN: INSUFICIENTE Y RÍXIDA

 

Na mañana de güei celebróse una xunta de la Mesa Sectorial de Negociación cola Conseyería d’Educación y Cultura. La propuesta que llevó l’Alministración como remspuesta a les repitíes demandes de les organizaciones sindicales y de la mesma Xunta de Personal Docente ye l’amenorgamientu, pal profesoráu de Secundaria, d’una de les hores complementaries selmanales que se va añedir al cómputu mensual del horariu.

Esta midida pa SUATEA ye totalmente insuficiente si nun vien acompañada d’una recuperación de les plantiyes y una revisión de los periodos lectivos que dexe tanto menguar la carga efectiva sobro’l profesoráu como atender les necesidaes educatives que se xeneren nos centros asturianos.

Amás, en SUATEA nun sofitamos una propuesta de l’Alministración énte la que nun había nengún marxe de negociación, foi una propuesta absolutamente cerrada ensin opción a los pidimientos espuestos polos distintos sindicatos. La resultancia yera d’esperar, la Conseyería d’Educación va aprobar el Resolvimientu ensin el sofitu de nenguna organización representante de los y les trabayadores.

Siguimos reivindicando l’apertura d’un procesu de negociación nel que   s’aborden globalmente les condiciones llaborales del profesoráu asturianu. Dende la Conseyería reconozse la esistencia d’un trabayu voluntarista, desempeñando funciones fuera del horariu llaboral, de los y les docentes estos últimos años, pero ello nun se traduz nuna inversión en personal nin nuna meyora de les condiciones de trabayu.

Llamentamos esta oportunidá perdida y vamos siguir esixendo una dignificación del llabor docente, el complimientu de los Alcuerdos de plantiyes y toes aquelles midíes qu’en definitiva nun busquen más que’l caltenimientu y meyora de la calidá educativa de los centros públicos n’Asturies.

Uviéu, 30 de xunu de 2017

Esta entrada tamién se puede consultar en: Castellanu