La paradoxa de recurrir xudicialmente pa que se cumpla la llei.

Esta entrada está disponible en: Castellano (Castellanu)

EL TSXA ANULA, EN PARTE, LA CIRCULAR D’ANICIU CURSU POLA QUE SE DICTEN INSTRUCCIONES PAL CURSU ESCOLAR 2020-2021 PA LOS CENTROS DOCENTES PÚBLICOS.
Nel mes de setiembre, tres la publicación de la circular d’entamu de cursu SUATEA yá denunció públicamente los criterios dictaos nes instrucciones pa ellaborar los horarios de les maestres d’Audición y Llinguaxe y Pedagoxía Terapéutica, por considerales non solo carentes de sentíu, sinón por perxudicar gravemente l’atención especializada del alumnáu.
Tanto la LOMCE (art. 71) vixente naquel momentu, como l’actual LOMLOE establecen, amás del principiu d’inclusión, que correspuende a les Alministraciones educatives asegurar los recursos necesarios pa que los alumnos y alumnes que rican una atención educativa distinta a la ordinaria […] puedan algamar el máximu desenvolvimientu posible de les sos capacidaes personales y, sía que non, los oxetivos establecíos con calter xeneral para tol alumnáu. Y esto solo recueye, perriba, el testu de la Convención de Nueva York sobro los derechos de les persones con discapacidá, ratificada por España en 2007.
Lo que reclamaron, per un llau, les families, en cuantes que derechu fundamental de les sos fíes y fíos, como, per otru, el mesmu profesoráu y SUATEA, yera a cencielles eso, que se fixera cumplir la Llei en llugar d’acutar l’atención especializada inventándo criterios pelegrinos nuna circular.
Resulta llamentable que l’actual Conseyería, amás de les anteriores, prefiriera nun facer casu de les reclamaciones que mientres años lleva faciendo la comunidá educativa en contra de los criterios economicistes impuestos p’aforra maestres de PT y AL y, con ello, precarizar l’atención educativa del alumnáu que más lo precisa, amás d’empeorar tamién les condiciones llaborales d’estes especialistes y que SUATEA se vio obligada a demandar xudicialmente énte la sordera de l’Alministración.
A la espera de la sentencia xudicial de la nuestra demanda, dende SUATEA celebramos la del Tribunal Superior de Xusticia d’Asturies, y esiximos que se tenga bien en cuenta na redacción de futures normatives sobro inclusión y equidá educativa.

El Secretariáu de SUATEA
Uviéu, a 13 d’abril de 2021

Print Friendly, PDF & Email

Esta entrada está disponible en: Castellano (Castellanu)


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757