La LOMLOE nel Congresu

EL CONGRESU APRUEBA UNA LOMLOE AMEYORADA NEL SO TRÁMITE PARLLAMENTARIU, PERO TOVÍA LLOÑE  DE LES NECESIDAES EDUCATIVES ACTUALES

El discutiniu políticu y les demandes de la enseñanza privada en defensa d’unos privilexos que nun tienen comparanza n’Europa, nun tienen de atapar los defectos que nun soluciona la llei Celaá”

El Congresu dio güei, cola so aprobación nel Plenu, el primer pasu pa que la nueva llei orgánica d’educación que tien de sustituyir a la LOMCE sía una realidá nos próximos meses. Entá falta’l so pasu pel Senáu y, la eventual vuelta al Congresu pa la so aprobación definitiva, en casu de que la cámara alta introduza dalgún cambéu nel testu qu’aprueba güei el Congresu los diputaos.

La primer reflexón tien de ser sobre’l discutiniu políticu que ta llevantando esti proyeutu de llei. La ofensiva que tán protagonizando les dereches y les patronales de la enseñanza privada concertada, col sofitu d’otres organizaciones representatives d’esta enseñanza subvencionada con dineru público y na que tán utilizando a menores nes sos protestes, ye un tema políticu. Nun respuende, entós, a plantegamientos educativos nin pedagóxicos. Respuende a la defensa d’unos privilexos que se dieron n’España, que s’amontaron cola aprobación de la LOMCE n’avientu de 2013 y que nun se dan nel restu de países europeos, sacantes dalguna rara esceición.

Los cambeos qu’introduz la LOMLOE sobre inmersión llingüística, el papel de la enseñanza privada concertada o la eliminación de les reválides y l’amenorgamientu de les veces que l’alumnáu pue repitir a lo llargo de la so escolaridá obligatoria son p’afaese a la realidá de lo que yá asocede nos nuesos centros educativos con bon resultáu -la cooficialidá de les llingües propies-, o p’averase a lo que ye norma xeneral nos nuesos vecinos europeos que nin subvencionen la enseñanza privada, nin establecen carreres de torgues al alumnáu, si non que traten d’integralo poniendo los medios humanos y materiales pa ello.

Dende la Confederación de STEs-i celebramos ensin dulda la eliminación de los aspeutos más lesivos de la LOMCE: segregación del alumnáu, eliminación de competencies a claustros y conseyos escolares, calificación de la materia de Relixón, reválides. Igualmente avánzase nes nueves midíes d’almisión del alumnáu tocantes a la distribución equilibrada del alumnáu ente la pública y la concertada, esaníciase la posibilidá d’establecer perfiles de profesoráu. Celebramos que la coeducación, la inclusión ya inclusive la crisis climática sían aspeutos centrales de la esposición de motivos. La mayor autonomía de los centros educativos, la ufierta pública pal ciclu 0-3 años, les prohibiciones de donar suelu públicu pa la construcción de centros privaos y de subvencionar colexos que segreguen por razón de sexu, son toes elles midíes necesaries.

Sicasí, hai otros aspeutos y delles faltes que suponen tar lloñe del tresformamientu fondu que’l  nuesu sistema educativu precisa:

• La Relixón Católica tien de quedar fuera del currículu escolar. Nun ye bastante que nun cuente pa la nota media, que depués repercute en temes como la EBAU o la concesión de beques. La llaicidá tien de ser una de les bases del sistema educativu nun estáu aconfesional, como establez la Constitución Española que ye l’Estáu Español.
• Hai qu’afondar na xestión democrática de los centros. La LOMLOE, apenes ameyora la cuestión. Por casu, la eleición de les direcciones sigue dependiendo en gran parte de l’alministración.
• Échase de menos un amenorgamientu de ratio, imprescindible pa una meyora de la calidá de la enseñanza.
• Tien de reconocese’l llabor del profesoráu, ameyorando les sos condiciones llaborales y esta llei nun lo fai. L’horariu llectivu del profesoráu n’España ye, sensiblemente, superior al del restu de países europeos, por casu. Amás, dexa al Cuerpu de Profesores Técnicos de Formación Profesional como un cuerpu a desaniciar, ensin apurrir soluciones pa quien nun puea aportar al Cuerpu de Secundaria.
• Nun afita una forma racional d’Accesu a la Función Pública Docente. L’actual sistema que regula l’accesu a la docencia ta desfasáu. Ye un modelu memorísticu, bien alloñáu de les necesidaes de la sociedá actual. Coles mesmes, tien de solucionase la problemática de 170.000 persones interines, casi un terciu de la totalidá del profesoráu del sistema educativu públicu non universitariu. Hai que dar estabilidá a esti profesoráu, y esta llei tampoco la establez.
• Ha d’asegurase una financiamientu del sistema públicu d’enseñanza que la LOMLOE nun recueye.
• La eliminación de l’asignatura d’Ética na Enseñanza Secundaria Obligatoria ye inaceptable.
• La posibilidá de que’l personal docente puea ser separtáu de la docencia directa al alumnáu pola Inspección, da-y a ésta un poder escomanáu, mientres contribúi a denigrar el llabor docente.

19 de payares de 2020

Secretariáu Confederal de STEs-i