Home > Comunicaos > La LOMCE va empeorar la situación qu’espeya l’informe PISA

La LOMCE va empeorar la situación qu’espeya l’informe PISA

SUATEA Llama a oponese al desarrollu y implantación de la llei.

Ta acabante de publicase l’Informe PISA 2012 y determinaos sectores, ente los que s’atopa’l PP y el ministru Wert, aprovechen pa emburriar contra’l sistema educativu español y vendenos la LOMCE como la panacea que va iguar tolos problemes y va ponenos a la cabeza del ránking européu.

Si nos atenemos a los resultaos publicaos, les variaciones más significatives nun se refieren tanto a les puntuaciones sacaes como al empeoramientu de la equidá que paez dir xenerando una fendedura social que, de siguir el mesmu enclín, tendría consecuencies llacerioses na nuesa sociedá.

Que les diferencies socioeconómiques del alumnáu son un elementu determinante nos resultaos académicos ye una realidá bien conocida. Dende munchos sectores de la comunidá educativa manifestamos el papel trascendental de la educación como factor de compensación social y constituyó ún de los argumentos qu’enconten la oposición a la LOMCE.

Los datos colos que nos atopamos agora amuesen una medría de les diferencies de rendimientu en función de la estracción social y l’entornu cultural, un datu qu’hai qu’asociar cola necesidá d’aumentar l’atención a la diversidá y los sofitos educativos, nada que pueda desendolcase con una política de retayos qu’aumenta les ratio, mengua’l númberu de profesores y esanicia parte de los recursos educativos de los centros.

De fechu, l’estancamientu nos resultaos nel conxuntu del Estáu Español, cuando nos últimos años venía ameyorando adulces, hai qu’interpretalu como una consecuencia directa de los retayos y el consiguiente aumentu de la desigualdá. Magar somos escépticos sobre la utilidá de les pruebes PISA pa evaluar realmente la calidá del sistema educativu, nun dexa de ser significativu que’l nuesu llevaba años ameyorando de forma continua dende un puntu de partida bien per debaxo del d’otros estaos europeos.

La LOMCE va traer mayor segregación, ausencia de participación democrática, retayos na atención individualizada al alumnáu y peores condiciones llaborales pal profesoráu. Toos estos elementos contradicen les necesidaes evidenciaes pol informe que ta acabante de publicase y que constitúin otru argumentu más pa oponese a la nueva Llei. Por ello siguimos pidiendo a los docentes y al restu de la comunidá educativa que manifiesten el so refugu y faigan lo posible por que nun s’enllante la sinrazón nel día a día de los centros.

Ver documento en PDF

Esta entrada tamién se puede consultar en: Castellanu