La Llei d’Usu ta muerta ¡Viva la Oficialidá!

La Llei d’Usu ta muerta ¡Viva la Oficialidá!

Asina tenemos d’acoyer y celebrar los asturianos y asturianes la viniente oficialidá del asturianu y el gallego-asturianu cuando se reforme’l nuestru Estatutu d’Autonomía.

La Llei d’Usu y Promoción del Asturianu ta vieya, ta dando les últimes bocanaes depués de ser caltenida polos sucesivos gobiernos de PSOE, PP Y FORO n’estáu crioxenización a lo llargo de los sos venti años d’improductiva vida. Esti 23 de marzu cumple los años y nun atopamos nada que celebrar: nengún reglamentu la desarrolla, nun s’aplica y el so incumplimientu sistemáticu caractericen el so estáu catatónicu.

L’usu del asturianu nos medios de comunicación públicos nun llega nin a simbólicu. Les alministraciones públiques estatales nun atienen les piticiones feches n’asturianu y les d’Asturies amuésense munches veces roceanes. Les sovenciones a la industria cultural n’asturianu fueron mermando añu tres añu. Solo los distintos decretos de toponimia aprobaos-y tienen dalgo qu’agradeder, sicasí, igual qu’ella, caltiénense en neveres mui bien conservaos y nun acabamos de ver asoleyaos tolos nomes verdaderos de los nuestros pueblos nos medios de comunicación, nes carreteres, autopistes nin demás lletreros espardíos pel país.

La dotación presupuestaria pa l’aplicación de la Llei d’Usu, l’añu pasáu (2017) fue de 1,6 millones d’euros d’un presupuestu total de 4226 millones, lo que supón una ruindá del 0.0378 % del presupuestu global. Esa ruindá ye más grande si comparamos la cantidá dedicada n’Asturies a les sos llingües cola que dediquen otres comuninidaes: Galicia 5 millones, Euskadi 137, Cataluña 37, Navarra 7, Baleares 2,9, País Valenciá 15.

Tocántenes a la Educación, la situación nun ye muncho meyor:

• L’alumnáu d’Educación Infantil (EI), magar ser esta una etapa crítica na tresmisión y aprendizaxe de la llingua materna o de les llingües ambientales, lleva sufriendo’l más absolutu abandonu dende los 20 años de vida que tien la Llei d’Usu. L’alministración educativa lleva esos 20 años incumpliedo los sos mandaos y namás una ínfima parte d’esti alumnáu les recibe con una ruina carga horaria (1 hora selmanal) gracies a la presión de padres y madres, y al compromisu de los equipos directivos y profesoráu. Hai unes selmanes el Conseyu Escolar d’Asturies (CEPA) aprobó un dictamen so una propuesta de decretu de primera modificación del Currículu de la segunda etapa d’Educación Infantil (EI 3 a 6 años), presentáu pol Gobiernu asturianu al CEPA por dos vegaes, empeorando na segunda y definitiva propuesta aprobada: entá ensin publicar nel BOPA. Nesta propuesta, l’Asturianu y Gallego-Asturianu entra esplícitamente, depués d’estos venti años d’”Aparheid” llingüísticu, nel currículu EI. Sicasí, el tratamientu que recibirán les nuestres llingües propies va ser más restrictivu de lo que la Llei d’Usu posibilita y, poro, enforma alloñáu del tratamientu igualitariu y equilibráu que tienen les llingües propies n’otros territorios.Tanto ye asina que la modificación estrictamente curricular afecta solo a les manifestaciones culturales asturianes, y dientro d’elles,  inxértase’l conteníu relativu a la llingua asturiana de forma marxinal modificando ún de los oxetivos d’esta etapa amestándo-y lo sorrayao: “Descubrir y participar en algunas manifestaciones sociales, culturales y artísticas de su entorno desarrollando una actitud de interés y aprecio hacia el patrimonio cultural y en su caso, al patrimonio lingüístico lingüístico asturiano.”(sic). SUATEA propunxo modificar esa redacción faciendo una mención esplícita al nuestru idioma y nun fue aprobada nel CEPA.

Na primera propuesta plantegábase una implantación gradual hasta acabar nel cursu 19/20 ufiértándose a tol alumnáu d’EI, pero na segunda nun s’establez nengún calendariu  y condiciónase la so implementación al paecer de la persona titular de la Conseyería Educación y saltando percima’l mandáu de la nomada llei: “Se faculta a la persona titular de la Consejería de Educación y Cultura para autorizar el calendario de implantación progresiva de la enseñanza de Lengua Asturiana en los centros docentes que impartan el segundo ciclo de Educación Infantil, atendiendo a criterios de disponibilidad y capacitación del profesorado y al criterio de suficiencia presupuestaria en el caso de los centros sostenidos con fondos públicos.”(sic). SUATEA enmendó esti artículu pidiendo la xeneralización de la ufierta nel cursu que vien (2018/19). Nun fue aceptada.

• Na Educación Primaria empantánase l’acoyida y nun perpasó nunca’l 60% del alumnáu de la Pública, mientres que na Concertada y la Privada ye escasísima.
• Na Educación Secundaria y FP, daes les condiciones d’optatividá nes que s’alcuentra (contraries a la llei dende’l nuestru puntu vista), el porcentaxe d’escolarización ye significativamente más pequeñu. Amás, nel Bachilleratu, dende la Implantación de la LOMCE, la so carga horaria baxó en 3 hores selmanales quedando nuna simbólica hora selmanal.

En viendo la situación indigna nel Sistema Educativu del Asturianu y el Gallego-Asturianu, la llaceriosa implicación de l’Alministración na so normalización social y la falta de respaldu llegal que protexa’l so emplegu per parte la ciudadanía, nun ye d’estrañar que los sos detractores (PP y afines a Javier Fernández) s’enfoten agora en resucitala ente l’inminente nacimientu d’una moza y gayaspera Oficialidá. Dando’l llombu a la sociedá asturiana, a la xente de pueblu y del pueblu- a lo que tanto desprecien- a ellos prestaría-yos sentenciar: “La Llei d’Usu ta muerta (pelo baxino y riéndose cómplicemente ensin que los veamos), ¡Viva la llei d’Usu! (al altu la lleva y con ella na mano). Pero como canta’l premiu Nobel: Los tiempos tán cambiando.

El Secretariáu de SUATEA

N’Uviéu a 21 de marzu de 2018