Home > Comunicaos > La Internacional de les muyeres pola paz y el desarme

La Internacional de les muyeres pola paz y el desarme

El Día Internacional de les Muyeres pola Paz y el Desarme instauróse’l 24 de mayu de 1982 por grupos pacifistes de muyeres europees, pa recordar les campañes realizaes poles britániques que s’opunxeron a la OTAN y a la instalación de les sos bases militares. Güei, esta conmemoración val pa recordar al mundu la violencia que sufren les muyeres nos conflictos y post conflictos armaos.

El Resolvimientu 1325 (2000) del Conseyu de Seguridá de la ONU, ye la primera en que se trató l’efectu desproporcionáu y singular del conflictu armáu nes muyeres. Nesti resolvimientu sorráyase la importancia de que les muyeres participen n’igualdá ya intervengan dafechu na prevención y solución de los conflictos, l’afitamientu de la paz y el caltenimientu de la paz. Tamién encamienta a los Estaos Miembros a que garanticen la participación n’igualdá y la plena participación en tolos esfuerzos pa caltener y promover la paz y la seguridá y encamienta a tolos axentes a qu’aumenten la representación de la muyer ya incorporen una perspectiva de xéneru en toles esferes del afitamientu de la paz.

Reconociendo l’efectu que tien la violencia sexual nos conflictos nel caltenimientu de la paz y la seguridá, el Conseyu de Seguridá de la ONU aprobó’l resolvimientu 1820 del Conseyu de Seguridá onde se venceya esplícitamente la violencia sexual como táctica de guerra cola muyer, la paz y la seguridá. Les muyeres que s’atopen en zona de conflictu bélicu, tienen doble peligru, el deriváu del propiu conflictu y amás la violencia sexual que pueden sufrir per parte de los homes que tán nesti conflictu.

Pero non solo les muyeres en zones béliques sufren violencia sexual. Les muyeres migrantes son tamién bien vulnerables, asina en Mexico envalórase que 6 de cada 10 muyeres migrantes sufren violencia sexual nel so camín en busca del suañu americanu. Les muyeres Siries nel so periplu tamién sufrieron violencia sexual anque ye difícil llograr datos pol hermetismu d’estes ante posible represalies. Lo mesmo asocede coles muyeres migrantes Africanes.

La vulnerabilidá de les muyeres ye un fechu y ante esta situación la Organización de Muyeres de la Confederación Intersindical  y SUATEA esiximos:

– Que s’enceten les necesidaes y vulnerabilidaes específiques de les muyeres y neñes como respuesta a la crisis migratoria y de persones refuxaes p’apangar les graves consecuencies médiques y psicolóxiques que causen les migraciones traumátiques.

– Que se facilite que les muyeres tengan derechu a reclamar asilu y, cuidao que ‘l dominiu patriarcal de les sos sociedaes-yos niéga derechos, puedan facer de manera independiente.

– Que se protexa a les muyeres refuxaes frente a la violencia y se reconoza la violencia contra les muyeres como una forma d’escorribanda acordies cola Convención sobro los Refuxaos de les Naciones Xuníes.

– Que se dean respuestes con garantíes de xéneru acordies coles normes de derechos humanos tanto a los conflictos armaos como al drama de les persones abellugaes y desplazaes.

– Que se destinen partíes económiques específiques pa responder a les necesidaes específiques de les muyeres y pa promover la igualdá de xéneru y empoderar a les muyeres de les zones en conflictu.

Organización de Muyeres de la Confederación Intersindical y SUATEA
24 de mayu de 2017

Esta entrada tamién se puede consultar en: Castellanu