Home > Comunicaos > La incertidume y el plasmu dominen el final de cursu

La incertidume y el plasmu dominen el final de cursu

SUATEA ENCAMIENTA A LA CONSEYERÍA D’EDUCACIÓN A QUE RETIRE’L PROGRAMA DE PRÉSTAMU DE LLIBROS DE TESTU Y LA RESOLUCIÓN DEL MEDICAMENTAZU Y IGÜE LO QUE NESTI MOMENTU TOCA IGUAR.

 

A lo cabero d’esti cursu los centros educativos debátense ente la incertidume y el plasmu.

Incertidume: ente les direcciones pola falta d’información sobre l’aplicación de la LOMCE y les instrucciones d’aniciu del próximu cursu; ente’l profesoráu interín que nun sabe quién va examinar al so alumnáu si nun saca una vacante pal 1 setiembre; ente los opositores qu’alpenes conocen el día d’aniciu de les pruebes; ente los docentes que solicitaron una comisión de servicios y nun saben si la tienen concedida o non…

Plasmu: delantre les instrucciones pa ellaborar los itinerarios na ESO y Bachilleratu ensin tener el currículu publicáu nel BOPA, delantre la resolución sobre’l Programa de préstamu de los llibros de testu que dexa desamparaes a les direcciones de los centros, delantre’l “medicamentazu” cola resolución sobre l’alministración de medicamentos per parte del profesoráu, delantre la propuesta de les necesidaes de personal qu’implica facer la planificación que correspuende a la Dirección Xeneral …

Paez que frente a la inacción y parálisis de la Conseyería sobre los asuntos qu’urxen y son indispensables pal funcionamientu d’escueles y institutos, sí hai tiempu pa sacar normativa sobre cuestiones que, lloñe de solucionar los problemes qu’apuren a los docentes, apaecen de sópitu, ensin avisu nin negociación, pa cargar de mayores responsabilidaes a quien yá nun-y queda alpenes enerxía pa llegar al final del calandariu escolar.

La Conseyería tien d’iguar nestes feches una serie de procesos como son:

  • Publicar el currículu de secundaria y bachilleratu, polo que los centros qu’empiecen a organizar el cursu nestes feches, ven cómo tienen que facer el trabayu ensin directrices clares de cómo tienen qu’organizar les materies, qué ufierta tienen que facer al alumnáu, de qué profesoráu tienen que disponer en función de les materies, etc.
  • Publiquen güei lo rellacionao col aniciu del procesu selectivu qu’empieza a finales del mes de Xunu, poniendo nel BOPA les feches, los tribunales definitivos, sedes y les asignaciones d’opositores por tribunal, asina como la llista d’aspirantes almitíos y escluyíos. Esto a 12 díis del aniciu de les pruebes. Van quedar ensin esclariar los criterios de calificación o quién quedará o non escluyíu de la llista y con qué condiciones.
  • Dao que los interinos cesen a 31 d’agostu y parte del alumnáu de los IES fai exámenes en setiembre, queda por afitar quién va examinalos nel casu de que los docentes nun renueven contratu pa esa fecha.
  • Ta pendiente de resolver el procesu de concesión de comisiones de serviciu que ye necesariu pa que’l profesoráu funcionariu podia facer les peticiones en Xunetu.
  • Nestes feches l’Alministración afita les necesidaes de profesoráu de cada centru pal cursu siguiente. En Secundaria esti cursu la Dirección Xeneral de Personal Docente y Planificación Educativa evita la planificación “encargando” esti trabayu a les direcciones de los centros educativos talo como puede vese nesta comunicación: “Con carácter xeneral na etapa de Secundaria, principal afectada’l próximu cursu pola implantación de la LOMCE, recoyéronse na propuesta inicial sólo les places de plantiya ( publicada en BOPA) nel so casu coles resultes negatives del últimu CXT para que d’ehí en delantre los centros mos fagan llegar les sos necesidaes en función de les opciones LOMCE (materies opcionales, configuración del PMAR, FPB, etc) que decidan implantar pa que seyan oportunamente cubiertes.” Paradóxicamente los centros nun disponen del currículu, que marca materies opcionales, configuración del PMAR, FPB, etc necesariu pa establecer estes necesidaes. Increible!
  • Establecer el calandario fin de cursu onde se marquen les feches de peticiones del profesoráu funcionariu, en práctiques y interín.

Toos estos procesos tienen unos tiempos qu’han de cumplise rigurosamente pal correctu desenrrollu de l’actividá escolar. Vemos cómo estos procesos tán por iguar y mentanto dedíquense a coses tan absurdes como publicar resoluciones precipitaes qu’aborden temes perdelicaos ensin debatiles, nin muncho menos negociales y que traten temes tan importantes como la salú de los neños y neñes (aplicación de medicamentos per parte de los docentes) y la economía de les families asturianes (programa de préstamu de llibros de testu). A eso ye a lo que dedica les hores la Conseyera y el so equipu.

Uviéu, 10 de xunu del 2015

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344