La homologación ye la solución

Esta entrada está disponible en: Castellano (Castellanu)

La homologación ye la solución p’acabar cola discriminación salarial que sufre’l profesoráu asturiano.

Na mañana del llunes, 8 de marzu, axuntóse la Mesa Sectorial d’Educación pa tratar como únicu tema la negociación del segundu Plan d’Evaluación Docente que va afectar al conxuntu del profesuráu asturiano. Convién recordar qu’esti tema, el de la evaluación d’actividá docente, foi un asuntu qu’estremó fondamente al profesoráu asturiano mientres los postreros diez años en dos bloques que caltienen posiciones irreconciliables. Per un sitiu ANPE y UGT, partidaries  d’esti sistema que condiciona la retribución final a la productividá midida en base al cumplimientu d’unos criterios; por tanto, modalidá retributiva amestada a una evaluación que, nestos momentos, esiste solo n’Asturies. Nel otru llau, SUATEA y Comisiones Obreres venimos refugando esa fórmula, proponiendo como alternativa una medría salarial basada na creación d’un complementu específicu asemeyáu al qu’esiste nel restu de les comunidaes autónomes. é

La posición de SUATEA foi contraria a l’aprobación d’esti segundu plan qu’afonda l’aplicación de midíes de calter neolliberal que contribúin a estratificar y estremar al conxuntu de la plantiya docente nun elementu tan sensible como ye’l de la retribución del profesoráu qu’apaez estremáu nun númberu creciente de categoríes salariales. A ello hai qu’añedir l’agravante de la fienda ente’l cuerpu de maestros y maestres y el de Secundaria, que perxudica gravemente al primer grupu.

Nel intre de la xunta, SUATEA espunxo la so propuesta d’homologación que vien plantegando dende va tiempu tanto ente’l profesoráu como a la mesma Conseyería, al Gobiernu asturianu y a los Grupos Parlamentarios de la Xunta Xeneral.  Dende’l nuesu puntu de vista, esiste una grave fienda territorial ente la masa salarial que se percibe nel restu de Comunidaes Autónomes y n’Asturies. La diferencia salarial media colo que se cobra n’otros territorios asítiase en redol a los 300 € y raspia los 400 € si mos comparamos con Navarra. Esto débese a que la mayoría de los territorios, cuando recibieron les sos competencies en materia educativa, decidieron crear un complementu específicu de calter autonómicu, daqué que tamos esperando qu’asoceda n’Asturies dende l’añu 2001.

SUATEA plantegó una enmienda a la totalidá de la propuesta d’esti segundu Plan d’Evaluación docente, proponiendo una homologación del sueldu del profesoráu asturiano al traviés de la creación d’un Complementu Específicu Autonómicu por aciu una xubida llinial ya igual pa tolos cuerpos docentes. Pa llevar a cabu esa xuba, habría que partir de les partíes presupuestaries de los Planes d’Evaluación y aumentala en función de la cantidá necesaria hasta algamar el nivel d’homologación.  A lo llargo de la xunta, aportunemos en conocer cuálos son los argumentos que se sofiten dende la Conseyería pa inclinase pola evaluación docente en llugar de la homologación ensin recibir nenguna respuesta magar qu’esta postrera significa una repartida más xusta y equitativa qu’afectaría al conxuntu de la plantiya docente y contribuyiría a amenorgar les diferencies anguaño esistentes ente los distintos cuerpos.

Frente a les acusaciones calumnioses procedentes d’ANPE y UGT, volvemos aportunar en que SUATEA demanda y sofita una medría salarial pal profesoráu asturianu que suponga d’una vegada  por toes la homologación con retribuciones que se perciben nel restu del Estáu, pero refugamos que sía un incentivu basáu na evaluación  del profesoráu que, a les clares, resulta estratificador  y discriminatoriu. El profesoráu tien de saber qu’Asturies ye la única Comunidá qu’aplica esti modelu escluyente y segregador y que, dende va venti años, l’Alministración niéganos el cobru d’un complementu específicu autonómicu que beneficiaría a tol profesoráu por igual, tal como asocede nel restu de CCAA.

Uviéu, 8 de marzu 2021

Print Friendly, PDF & Email

Esta entrada está disponible en: Castellano (Castellanu)