La fendedura salarial sigue esistiendo

Esta entrada está disponible en: Castellano (Castellanu)

La fendedura salarial sigue esistiendo nes empreses españoles. Eso dicen varios informes que falen de les diferencies salariales ente homes y muyeres, a nivel xeneral y independientemente del puestu.

La causa principal qu’esplica esta desigualdá salarial tan grande ente muyeres y homes ta na tasa enorme de parcialidá qu’afecta mayormente a les muyeres. Esa ye la razón principal de la diferencia salarial, porque’l tantu por ciento de muyeres que trabayen a tiempu parcial ye tres veces más que’l de los homes.

La suba del salariu mínimu d’estos últimos años foi un factor decisivu a la hora de que menguara la fendura salarial de xéneru, que si nel 2019 yera del 22,6%, dos años más tarde baxó al 20,9%. Esta baxada de la diferencia salarial por cuenta la suba del SMI llévanos a la conclusión de que les muyeres tán pior pagaes, en términos xenerales, nos contratos más precarizaos.

Colos datos del 2010, el 38,8% de les muyeres tuvo un salariu inferior a 1.336,6 euros, el de los homes foi del 21,8%. El salariu mediu de les muyeres foi nel 2020 de 1.852 euros al mes, mentres que’l de los homes algamó los 2.210,3 euros.

Una de les razones pa explicar que seyan les muyeres les pior pagaes en ciertos sectores ye por cuenta lo poco que se valoren los trabayos dedicaos a los cuidaos y atender la casa. N’otros casos y ámbitos d’actividá, la falta de midíes eficientes pa la conciliación familiar entorga tovía más que les muyeres puedan algamar puestos con xornaes enteres y a aspirar a una carrera profesional nes mesmes condiciones que los homes.

Siguimos siendo les muyeres les qu’arenunciamos a los nuestros suaños profesionales pa facenos cargu de los neños y les neñes, les persones enfermes y mayores.

Hasta que nun exista una corresponsabilidá de verdá ente homes y muyeres nes llabores de los cuidaos, la igualdá salarial y la igualdá en restu de condiciones ente homes y muyeres nun vamos ser a ello. Demuéstrase que la fendedura tamién se da nos salarios altos. Colos datos de la Encuesta de Población Activa (EPA) del 2021, el 33,1% tuvieron unos ingresos de 2.295,2 euros o más, mentres que’l de les muyeres foi del 26,6%.

La xusticia entama a tener en cuenta esta discriminación. Por exemplu, el Tribunal Superior de Xusticia de Madril condenó a una empresa a retribuir a una trabayadora col mesmu salariu añal qu’al so compañeru de trabayu varón y a indenizala con 13.000 euros pol dañu moral que sufrió. Esta sala entendió que la empleada viose perxudicada, a raíz de pidir reducción de xornada pa cuidar  d’un fíu.

¿Tien que ser l’orde xurisdiccional el qu’acabe con estes situaciones discriminatories coles muyeres?, preguntámonos. ¿O será con midíes series qu’aparen los pies a les polítiques d’empresa que tienen eses diferencies llaborales ente homes y muyeres?

Tenemos que caminar xuntos y xuntes por desaniciar estes discriminaciones. Les empreses han comprometese a ello, y amás cumplir coles normes pa que seya efectiva la igualdá ente homes y muyeres. Les empreses de más de 50 trabayadores han tener un Plan d’Igualdá. Sin embargo, la fendedura salarial sigue calteniéndose lo mesmo qu’otres diferencies ente trabayadores.

Poro, la discriminación ye un fechu incuestionable: piores condiciones de trabayu, con mayores tases de paru, contratación temporal y parcialidá; piores condiciones de trabyau como xornaes partíes, mayor precisión y desixencia d’atención, mayor compresión al públicu, menor remuneración y menor promoción.

22 de febreru de 2023.

Organización de Mujeres CI
Secretaría de la Muyer de SUATEA

Print Friendly, PDF & Email

Esta entrada está disponible en: Castellano (Castellanu)