La falta de profesoráu pa les sustituciones supón un retayu más de la Conseyería

SUATEA denuncia: la falta de profesoráu pa les sustituciones supón un retayu más de la Conseyería d’Educación

Dellos centros educativos asturianos, como’l CP.Enrique Alonso, o’l IES Naranco d’Uviéu, ente otros, atópense ensin profesoráu que cubra les sustituciones. La Conseyería d’Educación tomó la decisión de nun realizar convocatories de docentes interinos dende’l 23 del pasáu mes de mayu, magar que dellos centros educativos solicitaren la sustitución del profesoráu que comunicara la so baxa médica. Y, según paez, nun tienen pensao faer más convocatories esti cursu.

Estes solicitúes de los centros taben feches dende hai yá díes (selmanes en dalgún casu), pero la Conseyería prefirió aforrar unos euros y dexar al alumnáu ensin el so tutor o tutora o ensin profesoráu especialista.

Los centros educativos tuvieron qu’arbitrar midíes estraordinaries p’atender a esi alumnáu: en dellos casos, tuvieron que xuntar cursos de niveles distintos; n’otros, piérdense los sofitos o posibles desdobles, clave na atención a la diversidá, y reagrúpense cursos.

Al nun contratar profesoráu sustitutu, dellos grupos van vese privaos del especialista que-yos daba clase y esa materia nun va poder ser impartida por naide, pues nun hai posibilidá material de qu’otru docente del centru se faiga cargu d’una materia de la que nun ye especialista.

El cursu nun acabó. Cuando se fixeron los pidimientos de sustituciones dende les direcciones de los centros, en dellos casos faltaben cuarenta díes pa final de cursu.

Pero la Conseyería prefirió nun facer  casu de los pidimientos de los centros y dexa a alumnáu de tolos niveles (Primaria, Secundaria, Bachilleratu, Formación Profesional….) ensin profesor y al profesoráu interino ensin la posibilidá de trabayar.

Esta midida conculca los derechos del alumnáu, pues quítase-y el derechu a recibir una educación de calidá ya inclusive a tener un tutor nesti periodu tan crucial como ye’l del final de cursu.

SUATEA esixi una rectificación d’esti tipu de polítiques, que nun son más qu’una amuesa de los retayos educativos que practica esta Conseyería, y que se dea cobertoria inmediata de les necesidaes de los centros educativos.

Uviéu, 2 de xunu de 2017