Home > Profesoráu > Profesoráu interín > Bolses de trabayu > La falta previsión conderga les sustituciones les plantiyes

La falta previsión conderga les sustituciones les plantiyes

Esti mes de mayu, vimos cómo se diben escosando les llistes y bolses de personal interín d’estremaes especialidaes; cómo munches de les places convocaes selmanalmente nun s’axudicaron. Mentanto, la nuesa Conseyería, en llugar d’adelantase a esta situación y prever posibles soluciones abriendo nueves bolses, díba enrocándose en llamamientos reiterativos selmana tres selmana que nun dan llugar a axudicación nenguna.  Anguaño, la situación ye la siguiente:

–   El CP Cabueñes de Xixón quedó ensin docente de llingua asturiana na axudicación del pasáu día 17. SUATEA solicitó a la nuesa Conseyería l’apertura d’una bolsa’l día 5 de marzu. Nel mesmu escritu, amosábase la situación que vivía l’área de llingua a la Dirección Xeneral de Personal Docente y a la Dirección Xeneral de Planificación Llinguística y Normalización. La nuesa Alministración diba tardar más d’un mes en danos rempuesta a tal demanda, espublizando l’apertura la bolsa nel portal educastur el 16 d’abril.

–  El CP Atalía de Xixón, el CP Ventanielles y el C.P. Maestru José Antonio Robles de Caborana siguen ensin docentes d’inglés. Estos colexos súmense a dalgunos otros onde les sos vacantes tamién quedaron ensin cubrir nes convocatories del 25 d’abril (siete places ensin axudicar) y del 8 de mayu (una plaza ensin axudicar). SUATEA realizó una nueva solicitú d’apertura de bolsa, nesti casu pa la especialidá d’inglés, el día 3 de mayu. A día de güei, nun algamamos  rempuesta dalguna.

– El IES Jerónimo González en Llangréu, el IES La Corredoria n’Uviéu y el IES Salinas en Castrillón sufrieron situaciones asemeyaes a la hora de sustituyir al profesoráu de matemátiques que causó baxa al rodiu la Selmana Santa. Nesti casu, la forma de facer de la Conseyería d’Educación y Cultura foi convocar, de manera estraordinaria, al personal venceyáu de les llistes de tecnoloxía ya informática pa cubrir les places de matemátiques.

Col enfotu de que nun se repitan situaciones d’esta índole nel futuru, y n’analizando les distintes llistes y bolses de personal interino (númberu de persones que queden nes llistes o bolses actuales, la fecha d’apertura d’éstes últimes y el ritmu al que s’asoceden los llamamientos), teniendo en cuenta, amás, la especialidaes convocaes a oposición, vemos pertinente l’apertura de les siguientes bolses:

  1. Nos centros d’Educación Secundaria: dibuxu y gallego asturiano
  2. Nos Centros Integraos de Formación Profesional: taller de vidriu y cerámica, y producción testil y tratamientos fisicoquímicos.
  3. Nes Enseñanzas de Réxime Especial:
  • Profesoráu de música y artes escéniques: coru, órganu, danza clásica, caracterización y indumentaria, danza aplicada al arte dramático, dirección escénica, illuminación ya interpretación.
  • Profesoráu d’artes plásticas y diseñu: artes de grabáu y estampación.

El Secretariáu de SUATEA

Uviéu a 23 de mayu de 2018

Esta entrada tamién se puede consultar en: Castellanu