term

La cuadradura del círculu: seguridá sanitaria y condiciones ambientales nes aules

Esta entrada está disponible en: Castellano (Castellanu)

Que l’iviernu diba llegar, con o ensin baxaes térmiques estremes, yá se sabía por pura lóxica, sicasí -por si acasu- alvirtióse va meses nos distintos Comités de Salú llaboral y riesgos llaborales de la Conseyería d’Educación que les instrucciones y encamientos de ventilación nun diben ser compatibles coles temperatures ivernices y con unes condiciones de trabayu afeches, tanto pa docentes como para l’alumnáu, yeren igualmente evidentes y, por ello, propunxéronse midíes alternatives. Sicasí, como n’ocasiones anteriores, tamién nesto, la Conseyería d’Educación llega tarde.

El Real Decretu 486/1997, de 14 d’abril, pol que s’establecen les disposiciones mínimes de seguridá y salú nos llugares de trabayu diz, nel so Artículu 7: “La esposición a les condiciones ambientales de los llugares de trabayu nun tendrá de suponer un riesgu pa la seguridá y salú de los trabayadores. A tal fin, diches condiciones ambientales y, sobremanera, les condiciones termohigrométriques de los llugares de trabayu tendrán d’afaese a lo establecío nel anexu III”, en que’l so puntu 3 reza:

“Nos locales de trabayu zarraos tendrán de cumplise, sobremanera, les siguientes condiciones:

a) La temperatura de los locales onde se realicen trabayos sedentarios propios d’oficines o similares va tar entendida ente 17 y 27 ºC.

Énte l’ausencia d’instrucciones o midíes que faigan posible la compatibilidá ente la seguridá sanitaria frente al coronavirus y el caltenimientu de les temperatures llegalmente establecíes pal desempeñu llaboral nos centros educativos, SUATEA, per aciu de los sos delegaos y delegaes de prevención, en virtú de les sos competencies y facultaes – tal qu’establez l’artículu 36 de la Llei 31/1995, de 8 de payares, de prevención de Riesgos Llaborales- cursó un requerimientu énte la Conseyería d’Educación pa que, con calter urxente, adopten les midíes oportunes pa que les condiciones llaborales del personal docente se desenvuelvan nunes condiciones de temperatura afayadices.

Un requerimientu presentáu por delegaos de prevención supón, pa la empresa -nesti casu la Conseyería d’Educación- qu’esta tien d’adoptar les midíes fayadices o en casu de decisión negativa sobre les mesmes, dicha decisión tendrá de ser motivada.

Esperamos que la Conseyería atienda a razones y curie al so personal docente que, como siempres, ye quien ta protexendo’l derechu fundamental a la educación pública.

El Secretariáu de SUATEA, Uviéu 12 de xineru de 2021

Print Friendly, PDF & Email

Esta entrada está disponible en: Castellano (Castellanu)