La Conseyería sigue escluyendo a docentes de los llistaos d’interinos

Esta entrada está disponible en: Castellano (Castellanu)

Asoleyaes les vacantes: el cursu nun va poder entamar con normalidá’l 1 de setiembre.
La Conseyería d’Educación mantién la convocatoria de puestos vacantes col calandariu previstu inicialmente. Gracies la presión de dellos sindicatos, como foi’l casu de SUATEA, aceptóse iguar un garrapiellu d’erros materiales pero nin muncho menos solventar los problemes plantegaos cola publicación del llistáu d’interinos el pasáu 21 d’agostu.

La Conseyería d’Educación anecia en mantener el calandariu y en nun atender a les reclamaciones del profesoráu interín. Acordemos que munches persones fueron escluyíes de les listes d’aspirantes a interinidá como consecuencia de l’aplicación d’esti Alcuerdu, robláu por ANPE y FETE cola Alministración. Anteriormente nun había obligación de presentase al procesu selectivu pa permanecer en llista. Agora, col incrementu absurdu de requisitos pa formar parte de la mesma, milenta docentes tan siendo espulsaos d’elles.

Pesie que l’Alministración presume de sacar más places qu’en cursos anteriores en primer convocatoria, hai que tener en cuenta¡l númberu eleváu de xubilaciones a lo llargo d’esti postreru cursu, y esto nun ye más qu’un reconocimientu implíticu de l’alta tasa d’interinidá que sofre la escuela pública asturiana.

Amás, publícase un llistáu de vacantes nes que falten munches de les places que solicitaron los equipos directivos de los centros, esto tamién socede coles sustituciones de llarga duración, lo que dexa a los centros nuna situación complicada p’atender l’entamu del cursu escolar, ya que la siguiente convocatoria ta prevista pal 15 de setiembre, incorporándose’l día 22, col cursu escolar avanzáu tanto n’escueles como n’institutos.

Otra muestra del poco procuru, la improvisación y el maltratu a los sos trabayadores por parte de los responsables de l’Alministración ye qu’a a la hora na que se ta ellaborando esti comunicáu (media tarde) inda nun se publicó na páxina web de la Conseyería d’Educación referencia nenguna a la pitición de places que deben realizar los funcionarios en práctiques que superaron el procedimientu selectivu d’esti añu. Nun hai llistáu oficial, nun hai instrucciones oficiales,… xenerando una sensación de frustración y cansanciu por parte d’un colectivu que lleva a recostines un procesu llargu y estáru d’erros y imprecisiones.

La consecuencia ye que pesie a les supuestes bones intenciones de la conseyería, ellaboró un calandariu irracional col envís que los docentes tuvieren nos centros educativos a 1 de setiembre, la realidá ye que munchos claustros van tar incompletos, y munchos alumnos y alumnes nun va ser evaluaos pol mesmu docentes que-yos punxo clase durante’l cursu, ya que la conseyería negóse a prorrogar el contratu por unos díes a esti profesoráu.

Uviéu, 25 d’agosto del 2015

Print Friendly, PDF & Email

Esta entrada está disponible en: Castellano (Castellanu)