SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
Énte una Conseyería refractaria a les demandes de les/los sos trabayadores, la única opción que nos queda ye la de la movilización conxunta del personal docente
El xueves 9 de xunu aconceyó la Conseyería d’Educación cola Xunta de Personal pa encetar les resoluciones pendientes tres el postreru plenu de la Xunta de Personal, en payares de 2019. Mientres tou esti tiempu de pandemia, realizáronse milenta conceyos telemáticos ente les organizaciones sindicales y les distintes persones que fueron camudando nos distintos cargos políticos al mandu de la Conseyería, sicasí, en nenguna d’eses xuntes, nenguna de toes eses persones atopó un buecu pa poder responder a les demandes presentaes dende la parte social que representa al profesoráu.
La cita d’ayeri namá puede ser calificada como decepcionante dende SUATEA. Magar de tratase de reivindicaciones que vienen dende hai más de dos años , esta Conseyería nun da de pasu a nenguna de les nueses demandes. Pa mayor indignidá, la mesma Conseyera delegó en direcciones xenerales cuasi tola xunta, incorporándose ella a lo último, amosando d’esa manera una escasa empatía coles necesidaes plantegaes polos sos propios funcionarios.
Les bones palabres nun pueden despintar una realidá: tamos énte una Conseyería que nun ufierta nenguna solución positiva a les nueses reclamaciones. Nun va haber 23 hores llectives pal personal docente d’Infantil y Primaria el próximu cursu; nun va haber amenorgamientu horariu pal personal docente con más de 55 años por muncho que se trate d’un derechu recoyíu na Llei Orgánica d’Educación, nin s’acolumbren cambeos sustanciales na regulación de les medies xornaes nin nel so amenorgamientu numbéricu. Tampoco la reconocencia de los díes de llibre disposición (moscosos) qu’esfruta’l restu del personal funcionario asturiano, ye una realidá n’estudiu pero alloñada.
Tamos énte una Conseyería, otra más, que refuga les reivindicaciones del personal docente. Les sos esplicaciones de que los temes tán n’estudiu, conviértense en silenciu cuando se-yos entruga sobre datos concretos d’esos supuestos estudios o sobre cuál ye l’impactu económicu tan grave qu’aconseya refugar les propuestes. La dinámica de desmovilización inducida pola pandemia ta siendo utilizada dende l’Alministración pa perpetuar l’inmovilismu o imponer decisiones que nun se negocien colos órganos que representen al profesoráu.
Con un panorama asemeyáu, la perspectiva que tenemos per delantre’l personal docente asturiano ye enforma escura. L’actual desmovilización solo val pa favorecer los planes d’una Conseyería a la que les nueses necesidaes y reivindicaciones solo ocupen un llugar bien secundariu ente les sos esmoliciones. Solo con una movilización unitaria y masiva dende l’entamu del próximu cursu vamos poder aspirar a que se lleguen a reconocer les nueses reivindicaciones.
Uviéu 10 de xunu 2022
Esta entrada está disponible en: Castellano (Castellanu)
