La Conseyería pretende quitar les “declaraciones responsables”

La Conseyería d’Educación fexo anuncia l’otru mes de la so intención de quitar la llamada declaración responsable, pela qu’un trabayador/a que nun podía asistir un día al so puestu de trabayu nun necesitaba un xustificante mélicu pa que nun-y punxeren una falta. Escudándose nel supuestu abusu que faen dellos funcionarios de dicha declaración, Función Pública pretende quitala y la Conseyería d’Educación apuntóse encantada.

Asina, topámonos con que, en breve, un/a docente que tenga un día una indisposición que nun-y permita nin dir a trabayar nin dir al mélicu, suponiendo que-y dieren cita nel mesmu día, al final va perder non una sinón dos xornaes de trabayu: una pa recuperase y la otra pa dir al mélicu por un xustificante pa que nun-y pongan una falta inxustificada. En nome de la productividá, perderáse una xornada más de les necesaries.