La Conseyería persiste nel error de nun cumplir col espíritu de la sentencia del TXUE

Esta entrada está disponible en: Castellano (Castellanu)

COMUNICÁU DE SUATEA TRES LA XUNTA COLA CONSEYERÍA D’EDUCACIÓN SOBRE LA OPE EN MAESTROS

La Conseyería persiste nel error de nun cumplir col espíritu de la sentencia del TXUE

Güei xueves 23 de setiembre la Conseyería d’Educación convocó a les organizaciones sindicales a una xunta pa informar sobre  la concreción nes distintes especialidaes de la ufierta pública d’empléu (OPE) pa les oposiciones que se van convocar nel añu 2022 p’acceder al cuerpu de Maestros. Les especialidaes y númberu de places  yá fueron comunicaes a la Prensa ayeri enantes de la xunta.  Un total de 398 places: 370 d’ingresu llibre y 28 pal cupu reserváu a discapacidá. Distribuyíes por especialidaes: Educación Infantil: 100+7; Inglés: 80+6; Educación Física: 10+1; Música: 25+2; Pedadoxía Terapéutica: 55+4; Audición y llinguaxe: 25+2; y Primaria: 75+6.

Dende la firma de los “alcuerdos sobre calendariu y fixación de determinaos criterios  básicos aplicables de calendariu y fixación de criterios básicos de los procedimientos selectivos 18/22”, hubo cambeos importantes nel terrén xudicial (la sentencia del Tribunal de Xusticia de la Unión Europea( TXUE), de 19 de marzu de 2020, en base a la Directiva UE 1999/70) y nel llexislativu que pueden condicionar esos procesos. Dende SUATEA constatamos que, magar la sentencia del TXUE, siguen calteniéndose les ufiertes públiques d’empléu como única manera d’estabilización de la plantiya, ignorando les distintes posibilidaes d’estabilización nos sos puestos de trabayu de les persones contrataes n’abusu de temporalidá.

En vista de tolo anterior, preguntemos a los representantes de la Conseyería si, dempués de la convalidación parllamentaria del Real Decretu-llei 14/2021, de 6 de xunetu de midíes urxentes pal amenorgamientu de la temporalidá nel empléu públicu (pa tramitalo como proyectu de llei onde se va a definir cómo xestionar l’abusu de temporalidá del profesoráu interino contratao en fraude de llei), tien la Conseyería previsto analizar los más de 4000 puestos d’interinidá (más del 30% de la plantiya) pa saber cuántos d’ellos son estructurales ocupaos pol personal interín mientres más de 3 años, y poro n’abusu de temporalidá. Y si, una vegada estudiaos, tien camentao siguir ufiertándolos toos pa cubrir pol sistema concursu-oposición o va acutalos pa xestionar les midíes que disponga la futura llei d’amenorgamientu de la temporalidá.

Per otru llau, dende SUATEA consideramos que mientres se soluciona’l problema del personal interino contratao en fraude de llei ye necesario realizar un nuevu Alcuerdu d’Interinidá qu’acabe cola rotación y precarización del empléu favoreciendo la estabilidá del profesoráu nos puestos de trabayu.

Recordamos que la Directiva europea 1999/70/CE, nes sos clauses 4 y 5 diz: “el personal interino foi contratao non pa resolver cuestiones xustificaes de necesidá y urxencia, como diz la normativa, sinón pa cubrir vacantes permanentes y estructurales”. Amás, establez que, cuando se produz una situación d’abusu, la consecuencia ye que se tien qu’aplicar un mecanismu de sanción. La Directiva, d’obligáu cumplimientu polos Estaos miembros, nun foi trespuesta dafechu al desenvolvimientu normativu internu, pues trespúsose al Estatutu de los trabayadores nel so artículu 15.5, pero non al sector públicu.  

Amás, la sentencia del Tribunal de Xusticia de la Unión Europea (TXUE), de 19 de marzu de 2020, en base a la Directiva UE 1999/70, dictaminó qu’hubo abusu de temporalidá na contratación del personal eventual ya interino de toles Alministraciones Públiques. Esa sentencia alvierte que nin los procesos selectivos de llibre concurrencia, nin el tresformamientu del personal temporal o interino en “indefiníu non fixu” son la solución, una y bones les places qu’ocupen pueden ser oxetu d’amortización o incluyise nes ufiertes públiques d’empléu. Nenguna d’estes midíes garantiza la protección del personal público que sufrió abusu de la temporalidá.

 Poro, SUATEA conclúi que solo cola cobertoria de puestos per concursu-oposición nun s’atiende al espíritu dictáu pola sentencia del TXUE, y por contra ponse en grave riesgu los puestos de trabayu del personal interino contratao en fraude de llei.

El Secretariáu de Suatea

Uviéu, 23 de setiembre de 2021

Print Friendly, PDF & Email

Esta entrada está disponible en: Castellano (Castellanu)


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757