Home > Comunicaos > La conseyería entra en campaña electoral apoyando a ANPE y UGT

La conseyería entra en campaña electoral apoyando a ANPE y UGT

LA CONSEYERÍA ENTRA EN CAMPAÑA ELECTORAL APOYANDO A ANPE Y UGT

 

El pasáu 19  setiembre celebróse una Mesa Sectorial d’Educación na que’l Conseyeru ufiertaba a lo último la vuelta a les 18 hores lectives en Secundaria y un amenorgamientu de dos hores complementaries en Primaria pal cursu 2018-2019.

Anque nun respondía a les nueses demandes, paecíanos importante aceptalo p’asegurar unes meyores condiciones llaborales absolutamente necesaries y que constituyíen un clamor ente’l profesoráu. Como ye sabío, ANPE y UXT, énte la sorpresa del propiu Conseyeru, refugaron la ufierta alegando que nun yera asgaya: porque l’amenorgamientu en Secundaria diba producise de toles maneres (ensin nenguna base real pa ello); porque nun s’amenorgaba l’horariu llectivu en Primaria y porque nun contemplaba otres meyores necesaries.

Énte’l descreitu y l’estacazu electoral qu’esa decisión diba causar a estos sindicatos, l’Alministración salió al rescate ufiertando una nueva negociación pal próximu llunes , 26 de payares, dafechu na campaña electoral y, aparentemente, pa llava-yos la cara tanto a ANPE como a UGT.

En realidá, la nueva propuesta nun ufierta nada nuevo porque:

  1. Nun ufierta nada distinto a la propuesta de setiembre no tocante a condiciones llaborales: amenorgamientu de 2 hores lectives en secundaria y 2 hores complementaries en Primaria, esto ye, lo mesmo.
  2. La única novedá tanxible ye la ufierta d’un carné de profesoráu. Nun entendemos qu’esti asuntu sía una tema negociable, pues trátase d’un derechu que recueye la LOE y l’Alministración namá tien que dalu, tal como ella mesma se comprometió énte’l pidimientu unánime de la Xunta de Personal. Amás contempla la creación de dos grupos de trabayu: ún pa que s’analicen midíes pa la “simplificación alministrativa” y otru p’analizar “l’algame y les posibilidaes d’ampliación del plan d’evaluación”, ye dicir, ufierta “analís”, pero nada tanxible y namá fumu.
  3. Nun contempla nenguna de les demandes que realmente suponen una meyora de les condiciones de trabayu (razón alegada pa nun roblar l’alcuerdu n’ochobre), como l’amenorgamientu de la xornada a mayores de 55, l’amenorgamientu de les ratios, el cumplimientu de los alcuerdos de Primaria y Secundaria, la considerancia de les tutoríes de bachilleratu como hores llectives en Secundaria, que les de Primaria nun sían exercíes por especialistes, etc.

ANPE y UXT tán sofitando la so campaña electoral en dos aspeutos básicos: acusar de traidores a los sindicatos qu’aceptábamos la propuesta d’alcuerdu n’ochobre, por nun contemplar l’amenorgamientu d’hores llectives en Primaria, y en prometer siguir lluchando pol segundu tramu del Plan d’Evaluación docente. Esto ye, en llugar de defender la homologación salarial ensin condiciones como’l restu de CC.AA, piden qu’un porcentaxe cada vez mayor del nuesu salariu dependa d’una evaluación arbitraria que nun tien oldéu en nengún otru llugar del Estáu.

Por tolo enantes espuesto, SUATEA denuncia:

– La intromisión de la Conseyería d’Educación en metá d’una campaña electoral ufiertando una negociación que, magar de los nuesos pidimientos, diera por zarrada en septiembre.

– Qu’el nuevu alcuerdu qu’ufierta, no sustancial, nun s’estrema en nada de lo yá ufiertao con

anterioridá.

– Qu’inclúi puntos, como la creación de grupos de trabayu, ensin nenguna concreción real, pero que puen ser emplegaos por estos sindicatos como xustificante pa roblar lo mesmo qu’antes refugaron.

– Que nun ufierta nada nuevo qu’ameyore les condiciones llaborales del profesoráu.

– Que falta a la intelixencia del profesoráu ufiertando como llogru un alcuerdu cuasi idénticu al

primeramente refugáu por ellos.

– A la lluz de lo anterior, en SUATEA pensamos qu’esta propuesta ye’l regalu de l’Alministración a ANPE y UGT como agradecimientu a los servicios emprestaos.

– ANPE y UGT tendrán d’esplicar al profesoráu’l motivu pol que creen procedente esta negociación, yá qu’encontaron la so  nun robla en septiembre nel so vacíu conteníu, por considerar que l’amenorgamientu de xornada, taba algamáu na práctica.

Uvíeu, 23 de payares de 2018

El secretariáu de SUATEA

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3778

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3778